רבי אברהם אבן עזרא
לְךָ אֵלִי תְּשׁוּקָתִי בְּךָ חֶשְׁקִי וְאַהֲבָתִי.
לְךָ לִבִּי וְכִלְיוֹתַי לְךָ רוּחִי וְנִשְׁמָתִי:
לְךָ יָדַי לְךָ רַגְלַי וּמִמָּךְ הִיא תְּכוּנָתִי.
לְךָ עַצְמִי לְךָ דָמִי וְעוֹרִי עִם גְּוִיָּתִי:
לְךָ עֵינַי וְרַעְיוֹנַי וְצוּרָתִי וְתַבְנִיתִי.
לְךָ רוּחִי לְךָ כֹּחִי וּמִבְטָחִי וְתִקְוָתִי:
לְךָ לִבִּי וְדַם חֶלְבִּי כְּשֶׂה אַקְרִיב וְעוֹלָתִי.
לְךָ יָחִיד בְּלִי שֵׁנִי לְךָ תּוֹדֶה יְחִידָתִי:
לְךָ מַלְכוּת לְךָ גֵּאוּת לְךָ תֵּאוֹת תְּהִלָּתִי.
לְךָ עֶזְרָה בְּעֵת צָרָה הֱיֵה עֶזְרִי בְּצָרָתִי:
לְךָ אוֹחִיל בְּעֵת אָחִיל כַּיוֹלֵדָה בְאַנְחָתִי.
לְךָ שִׂבְרִי רְפָא שִׁבְרִי וְאֶת צִירִי וּמַכָּתִי:
לְךָ אֶהֱמֶה וְלֹא אֶדְמֶה עֲדֵי תָאִיר אֲפֵלָתִי.
לְךָ נֶצַח בְּךָ אֶבְטַח וְאַתָּה הוּא אֱיָלוּתִי:
לְךָ אֶזְעַק בְּךָ אֶדְבַּק עֲדֵי שׁוּבִי לְאַדְמָתִי.
לְךָ אֲנִי בְּעוֹדִי חַי וְאַף כִּי אַחֲרֵי מוֹתִי:
לְךָ אוֹדֶה וְאֶתְוַדֶּה עֲלֵי חֶטְאִי וְרִשְׁעָתִי.
לְךָ יִשְׁעִי סְלַח רִשְׁעִי וְאֶת פִּשְׁעִי וְאַשְׁמָתִי:
לְךָ אִכַּף וְאֶפְרֹשׁ כַּף שְׁמַע נָא אֶת תְּחִנָתִי.
לְךָ אֶבְכֶּה בְּלֵב נִדְכֶּה בָּרֹב שִׂיחִי וְתוּגָתִי:
לְךָ חֶסֶד לְךָ חֶמְלָה חֲמֹל עַל כָּל־תְּלָאוֹתִי.
וְגָדוֹל מִנְּשׂוֹא חֶטְאִי וְגָדְלָה יַָד מְשׁוּבָתִי:
וְלָכֵן גָּדְלוּ צִירַי וְקָצַרְתִי זְרִיעָתִי.
וְאוֹי עָלַי וְהָהּ לִי אִם תְּדִינֵנִי כְּרִשְׁעָתִי:
וְיִצְרִי צוֹרְרִי תָמִיד כְּמוֹ שָׂטָן לְעֻמָתִי.
יְעָצַנִי וּפִתָּנִי בְּמוֹעֵצוֹת לְרָעָתִי:
וְעָלָיו לֹא עֲלֵי בִּלְתּוֹ חֲמָסִי עִם תְּלוּנָּתִי.
וְעֵת יַעֲלוּ עֲלֵי לִבִּי עֲוֹנוֹתַי בְּמִטָּתִי:
מְאֹד אֶפְחָד וְגַם אֶרְעָד מְאֹד יִגְדַּל מְהוּמָתִי.
וְאֶרְגַּז עֵת אֱהִי זוֹכֵר לְפָנֶיךָ מְעֻוָתִי:
וְאֶעֱמֹד נֶגְדְּךָ עֵרוֹם וּמַה־תִּהְיֶה תְּשׁוּבָתִי.
בְּיוֹם בִּי יַעֲנֶה כַּחְשִׁי וְאֹכַל מִפְּרִי דָתִי:
וְיָבוֹאוּ יְמֵי שִׁלּוּם וְתִקְרַב עֵת פְּקֻדָּתִי.
וְשִׁמְעָךְ עֵת שְׁמַעְתִּיהוּ מְאֹד זַעְתִּי וְיָרֵאתִי:
וּמִי יַעֲמֹד לְפָנֶיךָ וּמִי יִהְיֶה תְמוּרָתִי.
וְאֵיךְ חֶשְׁבּוֹן לְךָ אֶתֵּן וְאֵיךְ אֶצְדַּק בְּטַעֲנָתִי:
וְאָשַׁמְתִּי וְאָרַבְתִי וּבָגַדְתִּי וּבָזִיתִי.
וְגָזַלְתִּי וְגָנַבְתִּי הֲרֵעוֹתִי וְהִרְשַׁעְתִּי:
וְגַם זַדְתִּי וְחָמַסְתִּי וְחָטָאתִי וְהֶחְטֵאתִי.
וְטָעִיתִי וְיָעַצְתִּי וְכִזַּבְתִּי וְכָפַרְתִּי:
וְלוֹצַצְתִּי וְגַם לַצְתִּי וּמָרַדְתִּי וּמָרִיתִי.
וְנִאַצְתִּי וְנִאַפְתִּי וְסָרַרְתִּי וְסָרַחְתִּי:
וַעָוִיתִי וְהֶעֱוֵיתִי וּפָשַׁעְתִּי וּפָגַמְתִּי.
וְצָרַרְתִּי וְצִעַרְתִּי וְקִלַּלְתִּי וְקִלְקַלְתִּי:
וְרָשַׁעְתִּי וְשִׁחַתְתִּי וְתִעַבְתִּי וְתָעִיתִי.
וְסַרְתִּי מִדְּרָכֶיךָ וְכִסַּתְנִי כְּלִמָּתִי:
וְהִגְדַּלְתִּי עֲשׂוֹת רֶשַׁע וְהֶחֱזַקְתִּי בְרִשְׁעָתִי.
וְכִחַשְׁתִי וּמָעַלְתִּי וְעָשַׁקְתִּי וְרַצּוֹתִי:
וְחָטָאתִי בְּרֵאשִׁיתִי וְרָשַׁעְתִּי בְּאַחֲרִיתִי.
וְאָשַׁמְתִּי בְּיַלְדוּתִי וּבָגַדְתִּי בְּזִקְנָתִי:
וּבָחַלְתִּי בְּתוֹרָתָךְ וּבָחַרְתִּי בְּתוֹרָתִי.
וְעָזַבְתִּי רְצוֹנֶךָ וְהָלַכְתִי בְּתַאֲוָתִי:
וְהִשְׁלַמְתִּי רְצוֹן יִצְרִי וְלֹא בַנְתִּי לְאַחֲרִיתִי.
וְהִרְבֵּיתִי לְהוֹסִיף חֵטְא עֲלֵי רִשְׁעִי וְחוֹבָתִי:
וְלָכֵן כִּסְּתָה פָנַי כְּלִמָּתִי וְגַם בָּשְׁתִּי.
וְאֵין לִי בִּלְתְּךָ מָנוֹס וּמִמָךְ הִיא סְלִיחָתִי:
וּמוֹחֵל בִּלְתְּךָ אַיִן וּמֵאִתָּךְ מְחִילָתִי.
וְאִם תָּבִיא בְּמִשְׁפָּט עַבְ- דְּךָ מַה הִיא גְבוּרָתִי:
וּמָה אֲנִי וּמַה חַיָּי וּמַה כֹּחִי וְעָצְמָתִי.
כְּקַשׁ נִדָף מְאֹד נֶהְדָּף וְאֵיךְ תִזְכֹּר מְשׁוּגָתִי:
וְנֶאֱלַמְתִּי וְנִכְלַמְתִּי וְכִסַּתְנִי כְּלִמָּתִי.
רְצוֹנָךְ אֶשְׁאֲלָה תָמִיד לְמַלֹּאות אֶת שְׁאֵלָתִי:
וְהֶרֶב כַּבְּסֵנִי מֵעֲוֹנוֹתַי וְחַטָּאתִי.
וְהַבֵּט רֹב תְלָאוֹתַי וְדַלוּתִי בְּגַָלוֹּתִי:
וְאַל נָא תַּעְלֵם אָזְנָךְ לְרַוְחָתִי לְשַׁוְעָתִי.
עֲרֹב עַבְדָּךְ לְטוֹבָה גַּם אֱמֹר נָא דַּי לְצָרָתִי:
וְהַרְאֵנִי תְשׁוּעָתָךְ בְּטֶרֶם יוֹם תְּמוּתָתִי.
וְיוֹם נָפְלִי בְּפַח מוֹקְשִׁי סְמֹךְ נָא אֶת נְפִילָתִי:
וְלַעֲנָה שָׂבְעָה נַפְשִׁי עֲדֵי קַצְתִּי בְחַיָּתִי.
עֲשֵׂה עִמִּי לְטוֹבָה אוֹת וְקוּמָה נָּא לְעֶזְרָתִי:
הֲכִי אַתָּה מְנַת חֶלְקִי וְרִנָּתִי וְטוֹבָתִי.
וְגוֹרָלִי וּמַהֲלָלִי וְכָל־גִּילִי וְשִׂמְחָתִי:
שְׂשׂוֹן לִבִּי וְאוֹר עֵינַי וּמָעֻזִי וְחֶמְדָתִי.
וּמַרְגּוֹעִי וְשַׁעֲשׁוּעִי מְנוחָתִי וְשַׁלְוָתִי:
הֲבִינֵנִי עֲבוֹדָתְךָ וְלָךְ תִּהְיֶה עֲבוֹדָתִי.
הֲשִׁיבֵנִי וְאָשׁוּבָה וְתִרְצֶה אֶת תְשׁוּבָתִי:
וְהוֹרֵַנִי דְרָכֶיךָ וְיַשֵּׁר אֶת נְתִיבָתִי.
וְתִשְׁמַע אֶת תְּפִלָּתִי וְתַעֲנֶה אֶת עֲתִירָתִי:
בְּכָל־לִבִּי דְּרַשְׁתִּיךָ עֲַנֵנִי יָהּ דְּרִישָׁתִי.
אֲנַסֵּךָ אֶת דְּמָעַי לָךְ מְחֵה חֶטְאִי בְּדִמְעָתִי:
וְנַפְשִׁי אָמְרָה חֶלְקִֵי יְהֹוָה הִיא וְנַחֲלָתִי.
אֱסֹף נָא אֶת עֲוֹנוֹתַי בְּחַסְדַָּךְ יוֹם אֲסִיפָתִי:
וְיוֹם לֶכְתִּי לְפָנֶיךָ רְצֵה נָא אֶת הֲלִיכָתִי.
וְעִם עוֹשֵׂי רְצוֹנֵֶךָ תְּנָה שְׂכַר פְּעֻלָּתִי:
וְתִשְׁלַח מַלְאֲכֵי הַחֵן וְיֵצְאוּ נָא לְעֻמָּתִי.
וְשָׁלוֹם בּוֹאֲךָ יֹאמְרוּ בְּקוֹל אֶחָד בְּבִיאָתִי:
יְבִיאוּנִי לְגַן עֶדְנָךְ וְשָׁם תִּהְיֶה יְשִׁיבָתִי.
וְאֶתְעַדֵּן בְּאוֹרֶךָ וְשִׂים כָּבוֹד מְנוּחָתִי:
וְאוֹר גָנוּז לְפָנֶיךָ יְהִי סִתְרִי וְסֻכָּתִי.
וְתַחַת צֵל כְּנָפֶיךָ תְּנָה נָּא אֶת מְחִצָתִי:
רב האיי גאון
שְׁמַע קוֹלִי אֲשֶׁר יִשְׁמַע בְּקוֹלוֹת. וְהָאֵל הַמְּקַבֵּל הַתְּפִלּוֹת:
וְהָעוֹשֶׂה בְּלִי חֵקֶר גְּדוֹלוֹת. וְנִפְלָאוֹת וְהַנּוֹרָא עֲלִילוֹת:
וְהֶחָכָם וְהַקַּיָּם לְעוֹלָם. וְהַגִּבּוֹר עֲלֵי כָּל־הַיְּכוֹלוֹת:
וְהָרַחוּם וְהַחַנּוּן וְהַטּוֹב. וְהֶחָסִיד וְהַמַּרְבֶּה מְחִילוֹת:
אֲשֶׁר עָנָה לְאַבְרָהָם וְיִצְחָק. וְיִשְׂרָאֵל לְמַלֹּאות כָּל־שְׁאֵלוֹת:
וְהָעוֹנֶה בְּבֵית כֶּלֶא לְיוֹסֵף. וּמִבּוֹר הֶעֱלָהוּ לַגְּדֻלּוֹת:
וְהָעוֹנֶה בְּמִצְרַיִם לְעַמּוֹ. וְהוֹצִיאָם לְחֵרוּת מִסְּבָלוֹת:
וְהָעוֹנֶה בַּיָּם וְיַּעֲבִירֵם. וְטִבַּע אוֹיְבֵיהֶם בַּמְּצוּלוֹת:
וְהָעוֹנֶה בְהַר סִינַי לְמֹשֶׁה. וֹבִשַּׂרְתּוֹ בְטוּבְךָ בַּגְּאוּלּוֹת:
וְהָעוֹנֶה לְאַהֲרֹן בַּקְּטֹרֶת. וְגַם פִּינְחָס עֲנִיתוֹ בַּפְּלִילוֹת:
וְהָעוֹנֶה יְהוֹשֻׁעַ וְעֵלִי. וְגַם חַנָּה בְּהִתְחַנְּנָהּ בְּמִלּוֹת:
וְהָעוֹנֶה שְׁמוּאֵל בַּתְּשׁוּעוֹת. וְהָעוֹנֶה עֲלֵי מַשְׁבֵּר לְחַלּוֹת:
וְהָעוֹנֶה שְׁלֹמֹה רַב שְלוֹמוֹת. וְגַם דָּוִד אֲשֶׁר שָׁר לָךְ בְּמַעֲלוֹת:
וְהָעוֹנֶה לְאֵלִיָּה בַּכַּרְמֶל. וְאֵשׁ יָרְדָה וְאָכְלָה מַאֲכָלוֹת:
וְהָעוֹנֶה בְיֶשַׁע לֶאֱלִישָׁע. וְחִזְקִיָּה עֲנִיתוֹ בַּתְּעָלוֹת:
וְהָעוֹנֶה בְלֵב הַיָּם לְיוֹנָה. וְהוֹצֵאתוֹ לְאוֹרוֹת מֵאֲפֵלוֹת:
וְהָעוֹנֶה חֲנַנְיָה וַעֲזַרְיָה. וּמִישָׁאֵל בְּהִצָּלוֹת לְהַפְלוֹת:
וְהָעוֹנֶה לְדָנִיאֵל בְּרַחֲמָיו. וּמַלְאָךְ חִלְּצָהוּ מִשְּׁחָלוֹת:
וְהָעוֹנֶה לְמָרְדְּכַי וְאֶסְתֵּר. וְהָפַכְתָּ יְגוֹנוֹתָם לְגִילוֹת:
וְהָעוֹנֶה בְמוֹ עֵזֶר לְעֶזְרָא. וְחַשְׁמוֹנִים עֲנִיתָם בַּחֲיָלוֹת:
וְהָעוֹנֶה בְּתוֹךְ מַעְגָּל לְחוֹנִי. בְּעֵת נִשְׁבַּע בְּשִׁמְךָ רַב פְּעֻלּוֹת:
וְהָעוֹנֶה לְכָל־צַדִּיק וְחָסִיד. אֲשֶׁר הָיוּ בְּכָל־דּוֹר בַּקְּהִלּוֹת:
וְהָעוֹנֶה אֳנִיּוֹת יָם בְּסַעֲרוֹת. וְהָעוֹנֶה לְמִתְעַנֶּה בְּמַחְלוֹת:
וְהָעוֹנֶה לְהוֹלְכִים בַּיְּשִׁימוֹן. וְהָעוֹנֶה אֲסִירִים בַּכְּבָלוֹת:
וְהָעוֹנֶה לְכָל־צוֹעֵק וְקוֹרֵא. וְכָל־בָּאִים לְפָנֶיךָ לְחַלּוֹת:
עֲנֵה עָנִי שְׁפַל כָּל־הַשְּׁפָלִים. וְשָׂא חֶטְאוֹ מְקַבֵּל הַתְּפִלּוֹת:
וְהַאֲרֵךְ נָא בְּרַחֲמֶיךָ שְׁנוֹתָיו. וְצַוֵּה כָּל־שְׁאֵלוֹתָיו לְמַלֹּאת:
וְתַחְשׁוֹב כָּל־תְּפִלּוֹתָיו קְטֹרֶת. לְפָנֶיךָ כְּקָרְבָּנוֹת וְעוֹלוֹת:
וְהָאֵל הַמְּקַבֵּל הַתְּפִלּוֹת. שְׁמַע קוֹלִי אֲשֶׁר יִשְׁמַע בְּקוֹלוֹת: