Machzor Yom Kippur Ashkenaz Linear, Customs of Yom Kippur Night

אַשְׁרֵי־הָאִישׁ אֲשֶׁר לֹא הָלַךְ בַּעֲצַת רְשָׁעִים, וּבְדֶֽרֶךְ חַטָּאִים לֹא עָמָד, וּבְמוֹשַׁב לֵצִים לֹא יָשָׁב: כִּי אִם בְּתוֹרַת יְהֹוָה חֶפְצוֹ, וּבְתוֹרָתוֹ יֶהְגֶּה יוֹמָם וָלָֽיְלָה: וְהָיָה כְּעֵץ שָׁתוּל עַל־פַּלְגֵי מָֽיִם, אֲשֶׁר פִּרְיוֹ יִתֵּן בְּעִתּוֹ וְעָלֵֽהוּ לֹא־יִבּוֹל, וְכֹל אֲשֶׁר־יַעֲשֶׂה יַצְלִֽיחַ: לֹא־כֵן הָרְשָׁעִים, כִּי אִם־כַּמֹּץ אֲשֶׁר־תִּדְּפֶֽנּוּ רֽוּחַ: עַל־כֵּן לֹא־יָקֻֽמוּ רְשָׁעִים בַּמִּשְׁפָּט, וְחַטָּאִים בַּעֲדַת צַדִּיקִים: כִּי־יוֹדֵֽעַ יְהֹוָה דֶּֽרֶךְ צַדִּיקִים, וְדֶֽרֶךְ רְשָׁעִים תֹּאבֵד:

לָֽמָּה רָגְשׁוּ גוֹיִם, וּלְאֻמִּים יֶהְגּוּ־רִיק: יִתְיַצְּבוּ מַלְכֵי־אֶֽרֶץ, וְרוֹזְנִים נֽוֹסְדוּ־יָֽחַד, עַל־ יְהֹוָה וְעַל־מְשִׁיחוֹ: נְנַתְּקָה אֶת־מוֹסְרוֹתֵֽימוֹ, וְנַשְׁלִֽיכָה מִמֶּֽנּוּ עֲבֹתֵֽימוֹ: יוֹשֵׁב בַּשָּׁמַֽיִם יִשְׂחָק, אֲדֹנָי יִלְעַג־לָֽמוֹ: אָז יְדַבֵּר אֵלֵֽימוֹ בְאַפּוֹ, וּבַחֲרוֹנוֹ יְבַהֲלֵֽמוֹ: וַאֲנִי נָסַֽכְתִּי מַלְכִּי, עַל־צִיּוֹן הַר־קָדְשִׁי: אֲסַפְּרָה אֶל חֹק, יְהֹוָה אָמַר אֵלַי בְּנִי־אַֽתָּה, אֲנִי הַיּוֹם יְלִדְתִּֽיךָ: שְׁאַל מִמֶּֽנִּי וְאֶתְּנָה גוֹיִם נַחֲלָתֶֽךָ, וַאֲחֻזָּתְךָ אַפְסֵי־אָֽרֶץ: תְּרֹעֵם בְּשֵֽׁבֶט בַּרְזֶל, כִּכְלִי יוֹצֵר תְּנַפְּצֵם: וְעַתָּה מְלָכִים הַשְׂכִּֽילוּ, הִוָּסְרוּ שֹֽׁפְטֵי אָֽרֶץ: עִבְדוּ אֶת־יְהֹוָה בְּיִרְאָה, וְגִֽילוּ בִּרְעָדָה: נַשְּׁקוּ־בַר, פֶּן־יֶאֱנַף וְתֹֽאבְדוּ דֶֽרֶךְ, כִּי־יִבְעַר כִּמְעַט אַפּוֹ, אַשְׁרֵי כָּל־חֽוֹסֵי בוֹ:

מִזְמוֹר לְדָוִד, בְּבָרְחוֹ מִפְּנֵי אַבְשָׁלוֹם בְּנוֹ: יְהֹוָה| מָה־רַבּוּ צָרָי, רַבִּים קָמִים עָלָי: רַבִּים אֹמְרִים לְנַפְשִׁי, אֵין יְשׁוּעָֽתָה לּוֹ בֵאלֹהִים סֶֽלָה: וְאַתָּה יְהֹוָה מָגֵן בַּעֲדִי, כְּבוֹדִי וּמֵרִים רֹאשִׁי: קוֹלִי אֶל־יְהֹוָה אֶקְרָא, וַיַּעֲנֵֽנִי מֵהַר קָדְשׁוֹ סֶֽלָה: אֲנִי שָׁכַֽבְתִּי וָאִישָֽׁנָה, הֱקִיצֽוֹתִי כִּי יְהֹוָה יִסְמְכֵֽנִי: לֹא־אִירָא מֵרִבְבוֹת עָם, אֲשֶׁר סָבִיב שָֽׁתוּ עָלָי: קוּמָה יְהֹוָה הוֹשִׁיעֵֽנִי אֱלֹהַי, כִּי־הִכִּֽיתָ אֶת־כָּל־אֹיְבַי לֶֽחִי, שִׁנֵּי רְשָׁעִים שִׁבַּֽרְתָּ: לַיהֹוָה הַיְשׁוּעָה, עַל־עַמְּךָ בִרְכָתֶֽךָ סֶּֽלָה:

לַמְנַצֵּֽחַ בִּנְגִינוֹת מִזְמוֹר לְדָוִד: בְּקָרְאִי עֲנֵֽנִי אֱלֹהֵי צִדְקִי, בַּצָּר הִרְחַֽבְתָּ לִּי, חָנֵּֽנִי וּשְׁמַע תְּפִלָּתִי: בְּנֵי־אִישׁ, עַד־מֶה כְבוֹדִי לִכְלִמָּה תֶּאֱהָבוּן רִיק, תְּבַקְשׁוּ כָזָב סֶֽלָה: וּדְעוּ כִּי־הִפְלָה יְהֹוָה חָסִיד לוֹ, יְהֹוָה יִשְׁמַע בְּקָרְאִי אֵלָיו: רִגְזוּ וְאַל־תֶּחֱטָֽאוּ, אִמְרוּ בִלְבַבְכֶם עַל־מִשְׁכַּבְכֶם, וְדֹֽמּוּ סֶֽלָה: זִבְחוּ זִבְחֵי־צֶֽדֶק, וּבִטְחוּ אֶל־יְהֹוָה: רַבִּים אֹמְרִים מִי־יַרְאֵֽנוּ טוֹב, נְסָה־עָלֵֽינוּ אוֹר פָּנֶֽיךָ יְהֹוָה: נָתַֽתָּה שִׂמְחָה בְלִבִּי, מֵעֵת דְּגָנָם וְתִירוֹשָׁם רָֽבּוּ: בְּשָׁלוֹם יַחְדָּו אֶשְׁכְּבָה וְאִישָׁן, כִּי־אַתָּה יְהֹוָה לְבָדָד לָבֶֽטַח תּוֹשִׁיבֵֽנִי:

שיר היחוד

ליום ראשון

חזן אָשִֽׁירָה וַאֲזַמְּרָה לֵאלֹהַי בְּעוֹדִי, הָאֱלֹהִים הָרֹעֶה אֹתִי מֵעוֹדִי:

קהל עַד הַיּוֹם הַזֶּה הֶחֱזַֽקְתָּ בְּיָדִי, חַיִּים וָחֶֽסֶד עָשִֽׂיתָ עִמָּדִי:

חזן בָּרוּךְ יְהֹוָה וּבָרוּךְ שֵׁם כְּבוֹדוֹ, כִּי עַל עַבְדּוֹ הִפְלִיא חַסְדּוֹ:

קהל אֱלֹהֵי מָרוֹם בַּמָּה אֲקַדֵּם, וּבַמָּה אִכַּף לֵאלֹֽהֵי קֶֽדֶם:

חזן אִלּוּ הָרִים לְמַעֲרָכָה, וְכָל־עֲצֵי לְבָנוֹן בַּכֹּל עֲרוּכָה:

קהל וְאִם כָּל־בְּהֵמוֹת וְחַיּוֹת קְרוּצִים, נְתָחִים עֲרוּכִים עַל הָעֵצִים:

חזן וְאַף זָוִיּוֹת מִזְבֵּֽחַ מְבוּסִים, דָּם כַּמַּֽיִם לַיָּם מְכַסִּים:

קהל וְכַחוֹל סֹֽלֶת דָּשֵׁן וְשָׁמֵן, בָּלוּל בְּרִבְבוֹת נַחֲלֵי־שָֽׁמֶן:

חזן וּלְאַזְכָּרָה לְבוֹנָה וְסַמִּים, וְלִקְטֹֽרֶת כָּל־רָאשֵׁי בְשָׂמִים:

קהל וְאִלּוּ נֵרוֹת עַל הַמְּנוֹרוֹת, יִהְיוּ מְאִירוֹת כִּשְׁנֵי הַמְּאוֹרוֹת:

חזן וּכְהַרְרֵי־אֵל לֶֽחֶם הַפָּנִים, עַל שֻׁלְחָנוֹת עֲרוּכִים בִּפְנִים:

קהל וְיַֽיִן כִּמְטַר הַשָּׁמָֽיִם, וְשֵׁכָר לְנֶֽסֶךְ כְּעֵינוֹת מָֽיִם:

חזן וְאִלּוּ כָּל־בְּנֵי אָדָם כֹּהֲנִים, לְוִיִּם מְשׁוֹרְרִים כִּכְנַף רְנָנִים:

קהל וְכָל־עֲצֵי עֵֽדֶן וְכָל־עֲצֵי יְעָרִים, כִּנּוֹרוֹת וּנְבָלִים לַשָּׁרִים:

חזן וְכָל־בְּנֵי אֱלֹהִים בְּקוֹל תְּרוּעָתָם, וְהַכּוֹכָבִים מִמְּסִלּוֹתָם:

קהל וְכָל־הַלְּבָנוֹן וְחַיָּה כֻלָּהּ, אֵין דֵּי בָּעֵר וְאֵין דֵּי עוֹלָה:

חזן הֵן בְּכָל־אֵֽלֶּה אֵין דֵּי לַעֲבֹד, וְאֵין דֵּי לְקַדֵּם אֵל הַכָּבוֹד:

קהל כִּי נִכְבַּֽדְתָּ מְאֹד מַלְכֵּֽנוּ, וּבַמֶּה נִכַּף לַאֲדוֹנֵֽינוּ:

חזן אָמְנָם לֹא יוּכְלוּ כַבְּדֶֽךָ, כָּל־חָי אַף כִּי־אֲנִי עַבְדֶּֽךָ:

קהל וַאֲנִי נִבְזֶה וַחֲדַל אִישִׁים, נִמְאָס בְּעֵינַי וּשְׁפַל אֲנָשִׁים:

חזן וְאֵין לְעַבְדְּךָ כֹּל לְכַבְּדֶֽךָ, לְהָשִׁיב לְךָ גְמוּל עַל חֲסָדֶֽיךָ:

קהל כִּי הִרְבֵּֽיתָ טוֹבוֹת אֵלָי, כִּי הִגְדַּֽלְתָּ חַסְדְּךָ עָלָי:

חזן וְרַב שִׁלּוּמִים לְךָ חֻיָּֽבְתִּי, כִּי עָשִֽׂיתָ טוֹבוֹת אִתִּי:

קהל וְלֹא חֻיַּֽבְתָּ לִּי גְּמוּלֶֽיךָ, כָּל־טוֹבָתִי בַּל־עָלֶֽיךָ:

חזן עַל הַטּוֹבוֹת לֹא עֲבַדְתִּֽיךָ, אַחַת לְרִבּוֹא לֹא גְמַלְתִּֽיךָ:

קהל אִם־אָמַֽרְתִּי אֲסַפְּרָה־נָּא כְמוֹ, לֹא יָדַֽעְתִּי סְפוֹרוֹת לָֽמוֹ:

חזן וּמָה אָשִׁיב לָךְ וְהַכֹּל שֶׁלָּךְ, לְךָ שָׁמַֽיִם אַף־אֶֽרֶץ לָךְ:

קהל יַמִּים וְכָל־אֲשֶׁר־בָּם בְּיָדֶֽךָ, וְכֻלָּם יִשְׂבְּעוּן מִיָּדֶֽךָ:

חזן וַאֲנַֽחְנוּ עַמְּךָ וְצֹאנֶֽךָ, וַחֲפֵצִים לַעֲשׂוֹת רְצוֹנֶֽךָ:

קהל וְאֵיךְ נַעֲבֹד וְאֵין לְאֵל יָדֵֽנוּ, וְלִשְׂרֵֽפַת אֵשׁ בֵּית קָדְשֵֽׁנוּ:

חזן וְאֵיךְ נַעֲבֹד וְאֵין זֶֽבַח וּמִנְחָה, כִּי לֹא־בָֽאנוּ אֶל־הַמְּנוּחָה:

קהל וּמַֽיִם אַֽיִן לְהַעֲבִיר טֻמְאָה, וַאֲנַֽחְנוּ עַל אֲדָמָה טְמֵאָה:

חזן שָׂשׂ אָנֹכִי עַל אֲמָרֶֽיךָ, וַאֲנִי בָֽאתִי בִּדְבָרֶֽיךָ:

קהל כִּי כָתוּב לֹא עַל־זְבָחֶֽיךָ, וְעוֹלֹתֶֽיךָ אוֹכִיחֶֽךָ:

חזן עַל־דְּבַר זֶֽבַח וְעוֹלוֹתֵיכֶם, לֹא צִוִּֽיתִי אֶת־אֲבוֹתֵיכֶם:

קהל מַה־שָּׁאַֽלְתִּי וּמַה־דָּרַֽשְׁתִּי, מִמְּךָ כִּי אִם־לְיִרְאָה אוֹתִי:

חזן לַעֲבֹד בְּשִׂמְחָה וּבְלֵבָב טוֹב, הִנֵּה שְׁמֹֽעַ מִזֶּֽבַח טוֹב:

קהל וְלֵב נִשְׁבָּר מִמִּנְחָה טְהוֹרָה, זִבְחֵי אֱלֹהִים רֽוּחַ נִשְׁבָּרָה:

חזן זֶֽבַח וּמִנְחָה לֹא חָפָֽצְתָּ, חַטָּאת וְעוֹלָה לֹא שָׁאָֽלְתָּ:

קהל מִזְבֵּֽחַ אֶבְנֶה בְּשִׁבְרוֹן לִבִּי, וַאֲשַׁבְּרָה אַף־רוּחִי בְּקִרְבִּי:

חזן רוּם לֵב אַשְׁפִּיל וְאֶת־רוּם עֵינָי, וְאֶקְרַע לְבָבִי לְמַֽעַן אֲדֹנָי:

קהל שִׁבְרֵי רוּחִי הֵם זְבָחֶֽיךָ, יַעֲלוּ לְרָצוֹן עַל מִזְבְּחֶֽךָ:

חזן וְאַשְׁמִֽיעַ בְּקוֹל הוֹדָיוֹתֶֽיךָ, וַאֲסַפְּרָה כָּל־נִפְלְאוֹתֶֽיךָ:

קהל אֲשֶׁר יָדְעָה נַפְשִׁי אַחְבִּֽירָה, אֲמַלֵּל גְּבוּרוֹת וַאֲדַבֵּֽרָה:

חזן וּמָה אֶעֱרֹךְ וְלֹא יָדַֽעְתִּי מָה, הֲיָכוֹל אוּכַל דַּבֵּר מְאֽוּמָה:

קהל כִּי אֵין חֵֽקֶר לִגְדֻלָּתוֹ, וְגַם אֵין מִסְפָּר לִתְבוּנָתוֹ:

חזן חֲכַם לֵבָב הוּא וּמִי כָמֽוֹהוּ, שַׂגִּיא־כֹֽחַ לֹא מְצָאנֽוּהוּ:

קהל עוֹשֶׂה גְדוֹלוֹת וְרַב נוֹרָאוֹת, גָּדוֹל אַתָּה וְעֹשֵׂה נִפְלָאוֹת:

חזן עַד אֵין מִסְפָּר וְעַד אֵין חֵֽקֶר, וְלֹא נוֹדַע כִּי לֹא יֵחָקֵר:

קהל אֵיזוֹ עַֽיִן אֲשֶׁר תְּעִידֶֽךָ, וְאֵיזֶה פֶּה אֲשֶׁר יַגִּידֶֽךָ:

חזן חַי לֹא רָאֲךָ וְלֵב לֹא יְדָעֶֽךָ, וְאֵיזֶה שֶֽׁבַח אֲשֶׁר יַצִּיעֶֽךָ:

קהל גַּם מְשָׁרְתֶֽיךָ לֹא רָאֽוּךָ, וְכָל־חַכְמֵי לֵב לֹא מְצָאֽוּךָ:

חזן אַתָּה לְבַדְּךָ מַכִּיר שִׁבְחֶֽךָ, וְאֵין זוּלָתְךָ יוֹדֵֽעַ כֹּחֶֽךָ:

קהל וְאֵין יוֹדֵֽעַ בִּלְעָדֶֽיךָ, שְׁבָחוֹת רְאוּיוֹת לִכְבוֹדֶֽךָ:

חזן עַל־כֵּן תְּבֹרַךְ כָּרָאוּי לָךְ, כְּפִי קָדְשְׁךָ כְּבוֹדְךָ וְגָדְלָךְ:

קהל וּמִפִּי הַכֹּל בְּכָל־אֱיָלוּתָם, כְּפִי מַדָּע אֲשֶׁר אַתָּה חֲנַנְתָּם:

חזן יוֹדוּ פִלְאֲךָ הַשָּׁמָֽיִם, וִיאַדְּרֽוּךָ קוֹלוֹת מָֽיִם:

קהל וְיָרִֽיעוּ לְךָ כָּל־הָאָֽרֶץ, יוֹדֽוּךָ כָּל־מַלְכֵי אָֽרֶץ:

חזן אַף יוֹדֽוּךָ כָּל־הָעַמִּים, וִישַׁבְּחֽוּךָ כָּל־הָאֻמִּים:

קהל כָּל־זֶֽרַע יַעֲקֹב עֲבָדֶֽיךָ, כִּי עֲלֵיהֶם גָּבְרוּ חֲסָדֶֽיךָ:

חזן אֶת־שֵׁם יְהֹוָה יְהַלְלוּ כֻלָּם, אֵל אֱלֹהִים אֱמֶת וּמֶֽלֶךְ עוֹלָם:

קהל בָּרוּךְ אַתָּה יָחִיד וּמְיֻחָד. יְהֹוָה אֶחָד וּשְׁמוֹ אֶחָד:

ליום שני

חזן וַאֲנִי עַבְדְּךָ בֶּן־אֲמָתֶֽךָ, אֲדַבֵּר אֲמַלֵּל גְּבוּרוֹתֶֽיךָ:

קהל דַּרְכֵי שִׁבְחֲךָ קְצָתָם אֲסַפֵּֽרָה, מַעֲשֶֽׂיךָ מַה־נּוֹרָא אֹמֵֽרָה:

חזן אֵין אֵלֶֽיךָ עֲרֹךְ בַּסֵּֽפֶר, אַגִּיד שְׁבָחוֹת עָצְמוּ מִסַּפֵּר:

קהל חֵֽקֶר אֱלֽוֹהַּ לֹא יִמָּצֵא, וְתַכְלִית שַׁדַּי לֹא תִקָּצֶה:

חזן וְלִתְבוּנָתוֹ הֲלֹא אֵין חֵֽקֶר, וּמִסְפַּר שָׁנָיו לֹא יֵחָקֵר:

קהל וְגַם אֵין מִסְפָּר לִגְדוּדֶֽיךָ, בְּצִבְאוֹתֶֽיךָ אוֹת כְּבוֹדֶֽךָ:

חזן אֵיזוֹ עַֽיִן אֲשֶׁר תְּעִידֶֽךָ, וְחַי לֹא רָאָה פְּנֵי כְבוֹדֶֽךָ:

קהל נָבוֹן וְחָכָם הֵן לֹא יֵדָע, וְאֵיךְ אֶעֱרֹךְ עַל אֲשֶׁר לֹא אֵדָע:

חזן וְאִם יֹאמַר אִישׁ עַד תַּכְלִיתוֹ, אֶעֱרֹךְ אֵלָיו וּבְמַתְכֻּנְתּוֹ:

קהל אָבוֹא וְאֶמְצָא תַּכְלִית שִׁבְחוֹ, לֹא־נֶאֶמְנָה אֶת־אֵל רוּחוֹ:

חזן יְבֻלַּע כִּי לֹא יֵדַע עֶרְכּוֹ, אַחֲרִית פִּֽיהוּ רֵאשִׁית דַּרְכּוֹ:

קהל וְעִמָּדִי לֹא כֵן אָנֹֽכִי, וּפִי לֹא אֶתֵּן לַחֲטֹא וְחִכִּי:

חזן אֲסַפְּרָה לְאֶחָי קְצוֹת דַּרְכֵי אֵל, וּלְיִשְׂרָאֵל מַה־פָּעַל אֵל:

קהל כַּכָּתוּב אִמְרוּ לֵאלֹהִים, מַה־נּוֹרָא מַעֲשֶֽׂיךָ אֱלֹהִים:

חזן וְאָמַֽרְתָּ עַם־זוּ יָצַֽרְתִּי, לִי יְסַפְּרוּ שְׁמִי וּתְהִלָּתִי:

קהל בְּמִצְרַֽיִם שַֽׂמְתִּי עֲלִילוֹתַי, לְמַֽעַן תְּסַפֵּר אֶת־אוֹתוֹתַי:

חזן וַאֲנִי עַבְדְּךָ עַל־כֵּן אֲסַפֵּר, כַּאֲשֶׁר אֶדְרשׁ מֵעַל סֵֽפֶר:

קהל תְּהַלֵּל נַפְשִׁי כֹּֽחַ מַעֲשֶֽׂיךָ, וְכָל־קְרָבַי אֶת־שֵׁם קָדְשֶֽׁךָ:

חזן וַאֲבָרֶכְכָה בְּכָל־עִנְיָנָי, וּבְכָל־לִבִּי אוֹדֶה אֶת־אֲדֹנָי:

קהל גַּם בִּגְרוֹנִי רוֹמְמוֹתֶֽיךָ, וְאֶת־פִּי אֲמַלֵּא תְהִלָּתֶֽךָ:

חזן כִּי פִי יַגִּיד תְּהִלָּתֶֽךָ, כָּל־הַיּוֹם אֶת־תִּפְאַרְתֶּֽךָ:

קהל וְאֹֽמְרָה נָּא עֱזוּז נוֹרְאוֹתֶֽיךָ, וְאָשִֽׂיחָה דִּבְרֵי נִפְלְאוֹתֶֽיךָ:

חזן וְאַזְכִּיר טוּבְךָ וְצִדְקוֹתֶֽיךָ, חֲסָדֶֽיךָ וּגְבוּרוֹתֶֽיךָ:

קהל יָדַֽעְתִּי כִּי־גָדוֹל אָֽתָּה, עַל כָּל־אֱלֹהִים מְאֹד גָּדָֽלְתָּ:

חזן כִּי כָּל־אֱלֹהֵי הָעַמִּים הֵם, אֱלִילִים אִלְּמִים רֽוּחַ אֵין בָּהֶם:

קהל הֵן לְעוֹבְדֵיהֶם גְּמוּל אֵין מְשִׁיבִים, וְלָֽמָּה לָהֶם הֵֽמָּה מְטִיבִים:

חזן וּבְעֵת צָרָה אָז יִתְפַּלָּֽלוּ, וְלֹא יַעֲנוּם כִּי לֹא יוֹעִֽילוּ:

קהל דּוֹרְשִׁים בְּכָל־לֵב לְרֽוּחַ אֵין בּוֹ, וְקָרוֹב יְהֹוָה אֶל־עַם קְרוֹבוֹ:

חזן הַיּוֹצֵר כֹּל הוּא אֱלֹהֵֽינוּ, הוּא עָשָֽׂנוּ וְלוֹ לְבַד אֲנָֽחְנוּ:

קהל עַם מַרְעִיתוֹ וְצֹאן יָדוֹ, נְבָרֵךְ שְׁמוֹ כִּי לְעוֹלָם חַסְדּוֹ:

חזן בַּצַּר לָֽנוּ מְאֹד נִמְצֵֽאתָ, כִּי דֹרְשֶֽׁיךָ לֹא־עָזָֽבְתָּ:

קהל וְתָמִיד בְּפִֽינוּ תְּהִלָּתֶֽךָ, וּמְהַלְלִים לְשֵׁם תִּפְאַרְתֶּֽךָ:

חזן עֵד אַתָּה בְּךָ וּבִכְבוֹדֶֽךָ, וּמְשָׁרְתֶֽיךָ אַף עֲבָדֶֽיךָ:

קהל אֲשֶׁר כְּבוֹדְךָ מְלֹא כָל־הָאָֽרֶץ, וּכְבוֹדְךָ עַל כָּל־הָאָֽרֶץ:

חזן וַאֲבוֹתֵֽינוּ בָּחֲרוּ אוֹתָךְ, לְבַדְּךָ לַעֲבֹד וְאֵין לְזָר אִתָּךְ:

קהל גַּם אֲנַֽחְנוּ אוֹתְךָ לְבַדֶּֽךָ, נַעֲבֹד כְּבֵן אָב וּנְכַבְּדֶֽךָ:

חזן וְהִנְנוּ עַל יִחוּדֶֽךָ, יוֹמָם וָלַֽיְלָה עֵדֶֽיךָ:

קהל בְּפִי כֻלָּֽנוּ וּבִלְבָבֵֽנוּ, שָׁאַתָּה לְבַדְּךָ אֱלֹהֵֽינוּ:

חזן אֱלֹהֵֽינוּ עַל יִחוּדֶֽךָ, עֵדִים אֲנַֽחְנוּ וַעֲבָדֶֽיךָ:

קהל אֵין תְּחִלָּה אֶל־רֵאשִׁיתֶֽךָ, וְאֵין קֵץ וְתִכְלָה לְאַחֲרִיתֶֽךָ:

חזן רִאשׁוֹן וְאַחֲרוֹן מִבְּלִי רֵאשִׁית, וּמִבְּלִי אַחֲרִית וְאֵין לֵב לְהָשִׁית:

קהל אֵין קֵֽצֶה אֶל־גַּבְהוּתֶֽךָ, וְאֵין סוֹף לְעֹֽמֶק מִדּוֹתֶֽיךָ:

חזן אֵין לְךָ סוֹבֵב וְאֵין לְךָ פֵּאָה, עַל־כֵּן אוֹתְךָ חַי לֹא רָאָה:

קהל אֵין צַד וְצֵלָע יַצְלִיעֽוּךָ, וְרֹֽחַב וָאֹֽרֶךְ לֹא יַמְצִיעֽוּךָ:

חזן אֵין פֵּאָה לִסְבִיבוֹתֶֽיךָ, וְאֵין תָּֽוֶךְ מַבְדִּיל בֵּינוֹתֶֽיךָ:

קהל אֵין חָכְמָה אֲשֶׁר תֵּדָעֶֽךָ, וְאֵין מַדָּע אֲשֶׁר יַגִּיעֶֽךָ:

חזן וְלֹא יַשִּׂיג אוֹתְךָ כָּל־מַדָּע, וְאֵין שֵֽׂכֶל אֲשֶׁר יָבִין וְיֵדָע:

קהל מִמְּךָ מְאֽוּמָה וְאֵיכָה אָֽתָּה, וְאֵיךְ בְּלִי מְאֽוּמָה כֹּל בָּרָֽאתָ:

ליום שלישי

חזן אָמְנָם יָדַֽעְתִּי כִּי אַתָּה, אֱלֹהֵי יַעֲקֹב כֹּל יָצָֽרְתָּ:

קהל אַתָּה בוֹרֵא וְלֹא נִבְרֵֽאתָ, אַתָּה יוֹצֵר וְלֹא נוֹצָֽרְתָּ:

חזן אַתָּה מֵמִית וְאֶת־כֹּל תְּבַלֶּה, אַתָּה מוֹרִיד שְׁאוֹל וְאַף תַּעֲלֶה:

קהל וְנֶאֱמָן לְהַחֲיוֹת מֵתִים אָֽתָּה, וְעַל יְדֵי נְבִיאֲךָ כֵּן הוֹדָֽעְתָּ:

חזן וְלֹא תָמוּת אֵל חַי וְלֹא־מַֽתָּה, מֵעוֹלָם וְעַד־עוֹלָם אָֽתָּה:

קהל מַשְׁבִּיר וּמוֹלִיד וְלֹא נוֹלָֽדְתָּ, מוֹחֵץ וְרוֹפֵא וְלֹא חֻלֵּֽיתָ:

חזן מָֽוֶת וּמַדְוֶה אֵין לְפָנֶֽיךָ, תְּנוּמָה וְשֵׁנָה אֵין לְעֵינֶֽיךָ:

קהל הֲלֹא מִקֶּֽדֶם אֵל חַי אָֽתָּה, מֵאֲשֶׁר בְּךָ לֹא נִשְׁתַּנֵּֽיתָ:

חזן וְעַד הָעוֹלָם לֹא תִשְׁתַּנֶּה, וּמֵאֱלָהוּתְךָ לֹא תִתְגַּנֶּה:

קהל חָדָשׁ וְנוֹשָׁן לֹא נִמְצֵֽאתָ, חִדַּֽשְׁתָּ כֹּל וְלֹא חֻדָּֽשְׁתָּ:

חזן לֹא יָחֽוּלוּ זִקְנָה וּבַחֲרוּת, עָלֶֽיךָ גַּם שֵׂיבָה וְשַׁחֲרוּת:

קהל וְלֹא־חָֽלוּ בְךָ שִׂמְחָה וָעֶֽצֶב, וְדִמְיוֹן נוֹצָר וְכָל־דְּבַר קֶֽצֶב:

חזן כִּי לֹא יְסוֹבֵב אוֹתְךָ גֶֽשֶׁם, אַף לֹא תִדְמֶה אֶל־כָּל־נֶֽשֶׁם:

קהל כָּל־הַיְצוּרִים גְּבוּל סִבַּבְתָּם, אֶל־רֵאשִׁיתָם וּלְאַחֲרִיתָם:

חזן כִּי הַבְּרוּאִים בִּגְבוּל שַׂמְתָּם, וְלִימֵי צְבָאָם גְּבוּל הִקַּפְתָּם:

קהל וּלְךָ אֵין גְּבוּל וּלְיָמֶֽיךָ, וְלִשְׁנוֹתֶֽיךָ וּלְעָצְמֶֽךָ:

חזן עַל־כֵּן אֵינְךָ צָרִיךְ לַכֹּל, לְיָדְךָ וּלְחַסְדְּךָ צְרִיכִים הַכֹּל:

קהל הַכֹּל צְרִיכִים לְצִדְקוֹתֶֽיךָ, וְאֵינְךָ צָרִיךְ לִבְרִיּוֹתֶֽיךָ:

חזן כִּי טֶֽרֶם כָּל־יְצִיר הָיִֽיתָ, לְבַדֶּֽךָ מְאֽוּמָה לֹא נִצְרָֽכְתָּ:

קהל רֵאשִׁית וְאַחֲרִית בְּיָדְךָ עֲרוּכִים, אַתָּה בָם וְהֵם בְּרוּחֲךָ שְׂרוּכִים:

חזן כָּל־אֲשֶׁר הָיָה בָרִאשׁוֹנָה, וַאֲשֶׁר יִהְיֶה בָאַחֲרוֹנָה:

קהל כָּל־הַיְצוּרִים וְכָל־מַעֲשֵׂיהֶם, וְכָל־דִּבְרֵיהֶם וּמַחְשְׁבוֹתֵיהֶם:

חזן מֵרֹאשׁ וְעַד־סוֹף תֵּדַע כֻּלָּם, וְלֹא תִשְׁכַּח כִּי אַתָּה אֶצְלָם:

קהל אַתָּה בְרָאתָם וְלִבְּךָ עֲרָכָם, לְבַדְּךָ תֵדַע מְקוֹמָם וְדַרְכָּם:

חזן הֵן אֵין דָּבָר מִמְּךָ נֶעְלָם, כִּי לְפָנֶֽיךָ נְכוֹנִים כֻּלָּם:

קהל אֵין חֽשֶׁךְ וְאֵין מָנוֹס וָסֵֽתֶר, לָנוּס שָֽׁמָּה וּלְהִסָּתֵר:

חזן אֵת אֲשֶׁר תְּבַקֵּשׁ אַתָּה מוֹצֵא, בְּלִי נְטוֹת אֲלֵיהֶם בְּעֵת שֶׁתִּרְצֶה:

קהל כִּי אֶת־הַכֹּל כְּאַחַת תִּרְאֶה, לְבַדְּךָ תַעֲשֶׂה וְאֵינְךָ נִלְאֶה:

חזן כִּי עַל־גּוֹי וְעַל־אָדָם יָֽחַד, עַל־כֹּל תְּדַבֵּר בְּרֶֽגַע אֶחָד:

קהל תִּשְׁמַע בְּרֶֽגַע כָּל־הַקּוֹלוֹת, זַֽעַק וָלַֽחַשׁ וְכָל־הַתְּפִלּוֹת:

חזן אַף תָּבִין אֶל־כָּל־מַעֲשֵׂיהֶם, בְּרֶֽגַע תַּחְקֹר כָּל־לִבְבֵיהֶם:

קהל וְלֹא תַאֲרִיךְ עַל מַחְשְׁבוֹתֶֽיךָ, וְלֹא תִתְמַהְמַהּ עַל עֲצָתֶֽךָ:

חזן אֵֽצֶל עֲצָתְךָ גְּזֵרָתֶֽךָ, לְקֵץ וּלְמוֹעֵד קְרִיאָתֶֽךָ:

קהל וְכֻלָּם בֶּאֱמֶת בְּתֹם וּבְיֽשֶׁר, מִבְּלִי עֹֽדֶף וּמִבְּלִי חֹֽסֶר:

חזן מִמְּךָ דָּבָר לֹא יֹאבַד, וְדָבָר מִמְּךָ לֹא יִכְבָּד:

קהל כָּל־אֲשֶׁר תַּחְפֹּץ תּוּכַל לַעֲשׂוֹת, וְאֵין מִי מוֹחֶה בְיָדְךָ מֵעֲשׂוֹת:

חזן יְכֹֽלֶת יְהֹוָה בְּחֶפְצוֹ קְשׁוּרָה, וּבִרְצוֹת יְהֹוָה לֹא אֵחֲרָה:

קהל אֵין דְּבַר־סֵֽתֶר מִמְּךָ נִכְחָד, עֲתִידוֹת וְעוֹבְרוֹת לְךָ הֵם יָֽחַד:

חזן אֲשֶׁר מֵעוֹלָם וְעַד הָעוֹלָם, הֵם כֻּלָּם בְּךָ וְאַתָּה בְּכֻלָּם:

קהל חֲדָשׁוֹת תַּגִּיד וְסוֹד דְּרָכֶֽיךָ, אֶל־עֲבָדֶֽיךָ וּמַלְאָכֶֽיךָ:

חזן וְאֵינְךָ צָרִיךְ לְהַשְׁמִיעֶֽךָ, דְּבַר סוֹד וָסֵֽתֶר לְהוֹדִיעֶֽךָ:

קהל כִּי מִמְּךָ כָּל־סוֹד יִגָּלֶה, בְּטֶֽרֶם עַל־לֵב כָּל־יְצִיר יַעֲלֶה:

חזן בְּלֵב כָּל־נִבְרָא לֹא תִמָּצֵא, מִפִּֽינוּ עָתָק לֹא יֵצֵא:

קהל בְּאֵין לוֹ קָצֶה וְלֹא יֵחָצֶה, לֵב לֹא יָתוּר וְאֵין פֶּה פוֹצֶה:

חזן בְּאֵין לוֹ רוּחוֹת וְלֹא רְוָחוֹת, אֵין לוֹ שִׂיחוֹת בּוֹ מוֹכִיחוֹת:

קהל לְמֵרָחוֹק מִי יִשָּׂא דֵעוֹ, לְלֹא תְחִלָּה וְלֹא סוֹף לְהַגִּיעוֹ:

חזן אֲגוּדִים אֲחוּדִים תָּֽוֶךְ וְסוֹף וָרֹאשׁ, פֶּה וָלֵב אֶבְלֹם מִדְּרשׁ וּמֵחֲרשׁ:

קהל גֹּֽבַהּ וָעֹֽמֶק נְעוּצִים בְּסוֹבֵב, חֲכַם־לֵב וְנָבוֹן לֹא יִלָּבֵב:

חזן סוֹבֵב אֶת־הַכֹּל וּמִלֵּא אֶת־כֹּל, וּבִהְיוֹת הַכֹּל אַתָּה בַכֹּל:

קהל אֵין עָלֶֽיךָ וְאֵין תַּחְתֶּֽיךָ, אֵין חוּץ לָךְ וְאֵין בֵּינוֹתֶֽיךָ:

חזן אֵין מַרְאֶה וְגַב לְאִחוּדֶֽךָ, וְאֵין גּוּף לְעֹֽצֶם יִחוּדֶֽךָ:

קהל וְאֵין בַּתָּֽוֶךְ מִמְּךָ נִבְדָּל, וְאֵין מָקוֹם דַּק מִמְּךָ נֶחְדָּל:

חזן וְאֵינְךָ נֶאֱצָל מִכֹּל וְנִבְדָּל, וְאֵין מָקוֹם רֵיק מִמְּךָ וְנֶחְדָּל:

קהל מִקְרֶה וְשִׁנּוּי אֵין בְּךָ נִמְצָא, וְלֹא זְמַן וְעַרְעָר וְלֹא כָּל־שִׁמְצָה:

חזן כָּל־זְמַן וְכָל־עֵת אַתָּה מְכִינָם, אַתָּה עוֹרְכָם וְאַתָּה מְשַׁנָּם:

קהל כָּל־מַדָּע לֹא יַשִּׂיג אוֹתָךְ, אֵין שֵֽׂכֶל אֲשֶׁר יִמְצָא אוֹתָךְ:

חזן כְּמִדָּתְךָ חָכְמָתֶֽךָ, כִּגְדֻלָּתְךָ תְּבוּנָתֶֽךָ:

קהל חָכָם אַתָּה מֵאֵלֶֽיךָ, חַי מֵעַצְמְךָ וְאֵין כְּגִילֶֽךָ:

חזן זוּלַת חָכְמָתְךָ אֵין חָכְמָה, בִּלְתִּי בִינָתְךָ אֵין מְזִמָּה:

קהל חָלַֽקְתָּ בְּלֵב חֲכָמִים שֵֽׂכֶל, וְרוּחֲךָ תְּמַלְאֵם וְדַעְתָּם תַּשְׂכֵּל:

חזן מִבַּלְעֲדֵי כֹחֲךָ אֵין גְּבוּרָה, וּמִבַּלְעֲדֵי עֻזְּךָ אֵין עֶזְרָה:

קהל אֵין נִכְבָּד כִּי אִם־כִּבַּדְתּוֹ, וְאֵין גָּדוֹל כִּי אִם־גִּדַּלְתּוֹ:

חזן כָּל־יְקָר וְכָל־טוֹב מִיָּדֶֽךָ, לַאֲשֶׁר תַּחְפֹּץ עֲשׂוֹת חֲסָדֶֽיךָ:

קהל אֵין חֵֽקֶר לִגְדֻלָּתֶֽךָ, וְאֵין מִסְפָּר לִתְבוּנָתֶֽךָ:

חזן אֵין עוֹד זוּלַת הֲוָיוּתֶֽךָ, חַי וְכֹל תּוּכַל וְאֵין בִּלְתֶּֽךָ:

קהל וְלִפְנֵי הַכֹּל כֹּל הָיִֽיתָ, וּבִהְיוֹת הַכֹּל כֹּל מִלֵּֽאתָ:

חזן לֹא לִחֲצֽוּךָ וְלֹא הִטּֽוּךָ, יְצוּרֶֽיךָ אַף לֹא מִעֲטֽוּךָ:

קהל בַּעֲשׂוֹתְךָ כֹל לֹא נִבְדָּֽלְתָּ, מִתּוֹךְ מְלַאכְתְּךָ לֹא נֶחְדָּֽלְתָּ:

חזן בַּעֲשׂוֹתְךָ אֶת־הַשָּׁמָֽיִם, אֶת־הָאָֽרֶץ וְאֶת הַמָּֽיִם:

קהל לֹא קֵרְבֽוּךָ וְלֹא רִחֲקֽוּךָ, כִּי כָל־קִירוֹת לֹא יְחַלְּקֽוּךָ:

חזן זֶֽרֶם מַֽיִם לֹא יִשְׁטְפֶֽךָ, וְרֽוּחַ כַּבִּיר לֹא יֶהְדֳּפֶֽךָ:

קהל אַף כָּל־טִנֹּֽפֶת לֹא תְטַנְּפֶֽךָ, אֵשׁ אוֹכְלָה אֵשׁ לֹא תִשְׂרְפֶֽךָ:

חזן לַהֲוָיוּתְךָ אֵין חֶסְרוֹן, וּלְיִחוּדְךָ אֵין יִתְרוֹן:

קהל כְּמוֹ הָיִֽיתָ לְעוֹלָם תִּהְיֶה, חֹֽסֶר וָעֹֽדֶף בְּךָ לֹא־יִהְיֶה:

חזן וְשִׁמְךָ מְעִידְךָ כִּי הָיִֽיתָ, וְהֹוֶה וְתִהְיֶה וּבַכֹּל אָֽתָּה:

קהל הֹוֶה לְעוֹלָם וְכֵן נוֹדָֽעְתָּ, נְעִידְךָ וְכֵן בְּךָ הַעִידֽוֹתָ:

חזן שָׁאַתָּה הוּא וְהֹוֶה בַכֹּל, שֶׁלְּךָ הַכֹּל וּמִמְּךָ הַכֹּל:

קהל שְׁמוֹת יְקָרְךָ יַעֲנוּ וְיָעִֽידוּ, בְּתֹֽקֶף יְקָרְךָ בְּךָ יַסְהִֽידוּ:

ליום רביעי

חזן אֲרוֹמֵם אֱלֹהֵי אָבִי וְאֵלִי, אַנְוֶה אֱלֹהֵי צוּרִי וְגֹאֲלִי:

קהל אֲיַחֵד אֱלֹהֵי הַשָּׁמַֽיִם, וְהָאָֽרֶץ בְּכָל־יוֹם פַּעֲמָֽיִם:

חזן אֵל חַי אֶחָד הוּא בְרָאָֽנוּ, אֲבִיר יַעֲקֹב אָב לְכֻלָּֽנוּ:

קהל אֲדוֹנֵֽנוּ אֲדוֹן כָּל־הָאָֽרֶץ, מָה־אַדִּיר שִׁמְךָ בְּכָל־הָאָֽרֶץ:

חזן אֵין כָּאֵל אֵשׁ אוֹכְלָה וְקַנָּא, לְעוֹלָם יְהֹוָה אֱמֶת אֵל אֱמוּנָה:

קהל אוֹרִי וְיִשְׁעִי מָעוֹז חַיָּי, עָלָיו תְּלוּיִם כָּל־מַאֲוַיָּי:

חזן אֱלֹהִים אֱמֶת הוּא אֱלֹהִים חַיִּים, לֹא־יָכִֽילוּ זַעְמוֹ גּוֹיִם וְאִיִּים:

קהל אַדִּיר וְאַמִּיץ כֹּֽחַ וְרַב אוֹנִים, אֱלֹהֵי הָאֱלֹהִים וַאֲדוֹנֵי הָאֲדוֹנִים:

חזן אֱלֽוֹהַּ עוֹשִׂי אִישִׁי וּבוֹעֲלִי, אַלּוּף נְעוּרַי שׁוֹמְרִי וְצִלִּי:

קהל בּוֹרֵא כֹל וְיִשְׂרָאֵל גּוֹאֵל, בָּרוּךְ אֱלֹהִים אֱלֹהֵי יִשְׂרָאֵל:

חזן בּוֹרֵא רֽוּחַ הָרִים יוֹצֵר, מִמְּךָ מְזִמָּה לֹא יִבָּצֵר:

קהל גֵּאֶה מֵשִׁיב גְּמוּל עַל־גֵּאִים, עַל הָרָמִים וְעַל הַנִּשָּׂאִים:

חזן גִּבּוֹר בְּקוּמוֹ לַעֲרֹץ בְּעֶבְרָה, מֵהֲדַר גְּאוֹנוֹ מִי לֹא יִירָא:

קהל גָּבֽוֹהַּ כָּל־אֲשֶׁר תַּחְתָּיו נוֹשֵׂא, וּגְדָל־כֹּֽחַ גְּדוֹלוֹת עוֹשֶׂה:

חזן גָּדוֹל הוּא וּשְׁמוֹ בִּגְבוּרָה, אַרְיֵה שָׁאָג מִי לֹא יִירָא:

קהל דּוֹדִי דָּגוּל הוּא מֵרְבָבָה, אֵל נַעֲרָץ בְּסוֹד קְדוֹשִׁים רַבָּה:

חזן דַּיָּן יְתִב כְּעַתִּיק יוֹמִין, וּצְבָאוֹ עַל שְׂמֹאל וְעַל יָמִין:

קהל הֲדָרוֹ וְהוֹדוֹ עַל־בְּנֵי עֲבָדָיו, הָדָר הוּא לְכָל־חֲסִידָיו:

חזן הוּא אֵל אֱלֹהֵי הָרוּחוֹת לְכָל־, בָּשָׂר שׁוֹמֵֽעַ תְּפִלָּה מִכֹּל:

קהל וַדַּאי וָתִיק יוֹדֵֽעַ וָעֵד, יְהֹוָה יִמְלֹךְ לְעֹלָם וָעֶד:

חזן וַאֲשֶׁר חֶֽרֶב גַּאֲוָתֵֽנוּ, לְהִלָּחֵם מִלְחַמְתֵּֽנוּ:

קהל זוֹכֵר לְעוֹלָם בְּרִית רִאשׁוֹנִים, כְּיוֹם אֶתְמוֹל לוֹ אֶֽלֶף שָׁנִים:

חזן זֶה אֱלֹהֵֽינוּ וְלוֹ קִוִּֽינוּ, וְזִמְרָת יָהּ הוּא יִשְׁעֵֽנוּ:

קהל חֵֽלֶק יַעֲקֹב יוֹצֵר הַכֹּל, חַנּוּן יְהֹוָה וְחָסִיד בַּכֹּל:

חזן חֵי הָעוֹלָמִים יְהֹוָה חֶלְקִי, חֲכַם הָרָזִים יְהֹוָה חִזְקִי:

קהל טוֹב וּמֵטִיב הַמְלַמֵּד דֵּעָה, טְהוֹר עֵינַֽיִם מֵרְאוֹת בְּרָעָה:

חזן יָשָׁר יְהֹוָה וְיָשָׁר דְּבָרוֹ, יְדִידֵי יְדִידוּת מִשְׁכְּנוֹת דְּבִירוֹ:

קהל יוֹעֵץ וְגוֹזֵר וּמִי יְפִירֶֽנָּה, וְיַחְתֹּף וְיִפְעַל וּמִי יְשִׁיבֶֽנָּה:

חזן יָפֶה דוֹדִי יָפְיוֹ וְטוּבוֹ, יִרְאוּ וְיֶחֱזוּ צִיּוֹן בְּשׁוּבוֹ:

קהל כְּגִבּוֹר יֵצֵא כְּאִישׁ מִלְחָמוֹת, יָעִיר קִנְאָה לַעֲשׂוֹת נְקָמוֹת:

חזן כְּנֶֽשֶׁר עַל־כַּנְפֵי נְשָׁרִים, נָשָׂא עֲבָדָיו וְיִשֵּׁר הֲדוּרִים:

קהל כְּדֹב שַׁכּוּל וּכְנָמֵר שָֽׁחַל, כְּרָקָב וּכְעָשׁ וְרוּחוֹ כַנָּֽחַל:

חזן כְּדֹב שַׁכּוּל וּכְנָמֵר שׁוֹקֵד, דְּבָרוֹ לַעֲשׂוֹת כְּמַקֵּל שָׁקֵד:

קהל כַּבִּיר כֹּֽחַ לֵב כְּמוֹ שָֽׁחַל, כְּלָבִיא וְכַאֲרִי וְרוּחוֹ כַנָּֽחַל:

חזן כְּאֶֽרֶז בָּחוּר בִּגְדֻלָּתוֹ, כִּבְרוֹשׁ רַעֲנָן עַנְוְתָנוּתוֹ:

קהל כְּתַפּֽוּחַ בְּרֵיחוֹ עֹז אַהֲבָתוֹ, עַל־יִשְׂרָאֵל גַּאֲוָתוֹ:

חזן כְּתַפּֽוּחַ בַּעֲצֵי הַיָּֽעַר, כֵּן דּוֹדִי עִם־יֽוֹשְׁבֵי שָֽׁעַר:

קהל כַּבִּיר כֹּֽחַ לְמַרְגִּֽיזֵי אֵל, נוֹקֵם וְכַטַּל הוּא לְיִשְׂרָאֵל:

חזן כּוֹסִי מְנָת חֶלְקִי וְגוֹרָלִי, אֲנִי לְדוֹדִי נַחֲלָה וְדוֹדִי לִי:

קהל כְּבוֹדִי יְהֹוָה לֹא אֲמִירֶֽנּוּ, הֶאֱמַרְנֽוּהוּ וְהֶאֱמִירָֽנוּ:

חזן כְּאַרְיֵה יִשְׁאַג וְכִכְפִיר יִנְהָם, אַל־יִהְיֶה כְגֵר וּכְאִישׁ נִדְהָם:

קהל כְּרוֹעֶה גִבּוֹר אֲשֶׁר לֹא יוּכַל, צֹאנוֹ לְהַצִּיל וְהָיָה לְמַאֲכָל:

חזן כְּגִבּוֹר אֵין אֱיָל וּכְאוֹרֵֽחַ, נָס וּבוֹרֵֽחַ מַר צוֹרֵֽחַ:

קהל כְּאַרְיֵה מַשְׁחִית וְכִכְפִיר לְעוֹזְבָיו, כְּרָקָב גַּם כְּעָשׁ לְאוֹיְבָיו:

חזן כַּבִּיר כֹּֽחַ כְּשָׁמִיר וָשַֽׁיִת, וְלֹא יַשְׁאִיר כְּנֹֽקֶף זַֽיִת:

קהל כְּשָׁמִיר וָשַֽׁיִת צָרִים יְמַגֵּן, כְּצִפֳּרִים עָפוֹת לְעִירוֹ יָגֵן:

חזן כְּגִשְׁמֵי נְדָבָה לָֽנוּ יָבוֹא, כְּמַלְקוֹשׁ וּכְטַל לַדְּבֵקִים בּוֹ:

קהל כְּנֶֽשֶׁר יְרַחֵף עַל גּוֹזָלָיו, וּבְצֵל כְּנָפָיו יֶחֱסוּ מְיַחֲלָיו:

חזן כְּצִפֳּרִים עַל עִירוֹ יָגֵן, וּבְצֵל כְּנָפָיו רְנָנוֹת נְנַגֵּן:

קהל לְבַדּוֹ הוּא וְנִפְלָאוֹת גְּדוֹלוֹת, עוֹשֶׂה אֵל נוֹרָא עֲלִילוֹת:

חזן לִצְבִי וְעֹֽפֶר דּוֹמֶה דוֹדִי, כִּי יְקַדְּמֵֽנִי אֱלֹהֵי חַסְדִּי:

קהל לִפְנֵי עַמּוֹ יְיַשֵּׁר הֲדוּרִים, וִינַשְּׂאֵם עַל־כַּנְפֵי נְשָׁרִים:

חזן לְעוֹלָם הוּא חֶלְקִי וְצוּר לְבָבִי, כָּלָה שְׁאֵרִי לְךָ וּלְבָבִי:

קהל לְבַדּוֹ יְהֹוָה הוּא וְנִפְלָאוֹת, גְּדוֹלוֹת עוֹשֶׂה וְרַב נוֹרָאוֹת:

חזן מָקוֹם וּמָעוֹן אַתָּה לְעוֹלָמֶֽךָ, וְאֵין יוֹדֵֽעַ אֶת־מְקוֹמֶֽךָ:

קהל מוֹרָאִי אֵל רוֹעִי וְיוֹצְרִי, צוּר יְלָדַֽנִי מְחוֹלְלִי וְצוּרִי:

חזן מָרוֹם וּמָעוֹז הוּא לִי וּמַחְסִי, מִגְדַּל־עֹז שֵׁם יְהֹוָה מְנוּסִי:

קהל מֶֽלֶךְ יַעֲקֹב מִשְׂגָּב לָֽנוּ, הוּא מְחוֹקְקֵֽנוּ וּמוֹשִׁיעֵֽנוּ:

חזן מִגְדּוֹל יְשׁוּעוֹת מִשְׁעָן יְהִי לִי, מִבְטַח אֱלֹהִים יְהֹוָה חֵילִי:

קהל מוֹשֵׁל עוֹלָם מַלְכוּתֶֽךָ, בְּכָל־דּוֹר וָדוֹר מֶמְשַׁלְתֶּֽךָ:

חזן מִי יִתֶּנְךָ כְּאָח לִי לְצָרָה, הוֹשַׁע יְהֹוָה כִּי יָדְךָ לֹא־קָצָֽרָה:

קהל מְקוֹר חַיִּים מִקְוֵה יִשְׂרָאֵל, לֹא אֶעֱזֹב כִּי מָעֻזִּי אֵל:

חזן מָגֵן יִשְׁעִי וְחֶֽרֶב גַּאֲוָה, לְשִׁמְךָ וּלְזִכְרְךָ נֶֽפֶשׁ תַּאֲוָה:

קהל מָגֵן הוּא לְכֹל הַחוֹסִים בּוֹ, אַשְׁרֵי אָדָם אֲשֶׁר עוֹז־לוֹ בוֹ:

חזן נָבָר וְנָעִים נָאוֹר וְנוֹרָא, נֶאְדָּר וְנֶאְזָר שְׁמוֹ בִּגְבוּרָה:

קהל נֶאֱמָן נֵֽצַח יִשְׂרָאֵל וְגוֹאֲלוֹ, לֹא יְשַׁקֵּר אַשְׁרֵי כָּל־חֽוֹכֵי לוֹ:

חזן נֵֽצַח יְשֻׁרוּן הָאֵל הַנֶּאֱמָן, מֵאֱלֹהָיו יְהוּדָה לֹא־אַלְמָן:

קהל נִפְלָא עַל כָּל־הַנִּפְלָאִים, וּמִתְנַשֵּׂא עַל כָּל־הַנִּשָּׂאִים:

חזן נִקְדָּשׁ וְנַעֲרָץ אֱלֹהַי קְדוֹשִׁי, נָכוֹן וְנִשְׂגָּב יְהֹוָה נִסִּי:

קהל נוֹקֵם וְנוֹטֵר וּבַֽעַל חֵמָה, לְצָרָיו וּלְאוֹיְבָיו אִישׁ מִלְחָמָה:

חזן נֵרִי יְהֹוָה בְּהִלּוֹ נֵרוֹ, עֲלֵי רֹאשִׁי וְנֵר לְרַגְלִי דְּבָרוֹ:

קהל סוֹמֵךְ וְסוֹעֵד יְהֹוָה סַלְעִי, סוֹבֵל וְסוֹלֵֽחַ וְנוֹשֵׂא פִשְׁעִי:

חזן סָהֲדִי יְהֹוָה סַלְעִי וְסִתְרִי, סוֹלֵֽחַ וְסוֹבֵל סַעֲדִי וְשִׂבְרִי:

קהל סַלְעֵֽנוּ וּמְצוּדָתֵֽנוּ, עֶזְרָתֵֽנוּ וּמְפַלְּטֵֽנוּ:

חזן עִזּוּז וְגִבּוֹר עֻזִּי וְעֶזְרִי, עֶלְיוֹן עֹז־לִי אַל־יְהִי עָרִי:

קהל עִיר וְקַדִּישׁ שָׁת סְבִיבָיו סֵֽתֶר, אָכֵן אַתָּה אֵל מִסְתַּתֵּר:

חזן עֵד מְמַהֵר לְשַׁלֵּם גְּמוּל לְאוֹיְבָיו, שֹׁמֵר הַבְּרִית וְהַחֶֽסֶד לְאֹהֲבָיו:

קהל פָּדָה אֶת־אַבְרָהָם יְדִידוֹ, הוּא יִפְדֶּה אֶת־יִשְׂרָאֵל עַבְדּוֹ:

חזן פַּֽחַד יִצְחָק יִתֵּן פַּחְדּוֹ, עַל צָרֵי בְנֵי יַעֲקֹב עַבְדּוֹ:

קהל פּוֹעֵל וְחוֹקֵר וְדוֹרֵשׁ וּבוֹדֵק, כָּל־הַלְּבָבוֹת לוֹ אֶתֵּן־צֶֽדֶק:

חזן צְרוֹר הַמֹּר אֶשְׁכּוֹל הַכֹּֽפֶר, נוֹתֵן לְעַמּוֹ צָרָיו כֹּֽפֶר:

קהל צַח וְאָדוֹם דּוֹדִי בִּצְבָאָיו אוֹת, עַל־כֵּן נִקְרָא שְׁמוֹ יְהֹוָה צְבָאוֹת:

חזן צַדִּיק יְהֹוָה הַצּוּר תָּמִים, אֶבְטַח עֲדֵי־עַד בְּצוּר עוֹלָמִים:

קהל צְבָא הַשָּׁמַֽיִם מִשְׁתַּחֲוִים לוֹ, שְׂרָפִים עֹמְדִים מִמַּֽעַל לוֹ:

חזן קָדוֹשׁ הוּא בְּכָל־מִינֵי קְדֻשּׁוֹת, כִּתּוֹת שָׁלשׁ קָדוֹשׁ מְשַׁלְּשׁוֹת:

קהל קַיָּם לְעָלְמִין אֱלָהָא חַיָּא, מָרֵא דְאַרְעָא וּמָרֵא דִשְׁמַיָּא:

חזן קוֹנִי מֵרֶֽחֶם מְקַנֵּא לְשׂוֹנְאָיו, קֶֽרֶן יִשְׁעִי וְקָרוֹב לְקוֹרְאָיו:

קהל רָחוֹק מִכֹּל וְאֶת־כֹּל רוֹאֶה, כִּי־רָם יְהֹוָה וְשָׁפָל יִרְאֶה:

חזן רֹעִי יְהֹוָה לֹא אֶחְסַר כֹּל, וְרַב־כֹּֽחַ וְרַב־חֶֽסֶד לַכֹּל:

קהל רַחוּם יְהֹוָה רוֹפֵא וּמְחַבֵּשׁ, לִשְׁבֽוּרֵי לֵב וְעָו‍ֹן כּוֹבֵשׁ:

חזן רֵעִי כֻּלּוֹ הוּא מַחֲמַדִּים, מִשְׁפָּטָיו אֱמֶת מְתוּקִים וַחֲמוּדִים:

קהל רִאשׁוֹן וְאַחֲרוֹן מֵעוֹלָם וְעַד־, עוֹלָם אַתָּה אֵל שׁוֹכֵן עַד:

חזן שַׁלִּיט מֶֽלֶךְ שְׁמַיָּא בְּכָל־דָּר וְדָר, לֵהּ אֲנָה מְשַׁבַּח מְרוֹמֵם וּמְהַדָּר:

קהל שֶֽׁמֶשׁ וּמָגֵן יְהֹוָה אֱלֹהִים, שׁוֹפֵט צֶֽדֶק וּמַשְׁפִּיל גְּבוֹהִים:

חזן שַֹגִּיא כֹֽחַ לֹא מְצָאנֽוּהוּ, יַשְׂגִּיב בְּכֹחוֹ וּמִי כָמֽוֹהוּ:

קהל שְׁלֹמֹה שְׁמוֹ כִּי שֶׁלּוֹ שָׁלוֹם, כִּי יְדַבֵּר אֶל־חֲסִידָיו שָׁלוֹם:

חזן שֵׁם יְהֹוָה אֶהְיֶה אֲשֶׁר אֶהְיֶה, כְּתוֹעֲפֹת רְאֵם לוֹ כִּכְפִיר וּכְאַרְיֵה:

קהל שַׁדַּי מְאוֹרִי מַלְכִּי וְאֵלִי, הַלְלוּיָהּ שְׁמוֹ נַפְשִׁי הַלֵּֽלִי:

חזן תִּתַּמַּם עִם יוֹשְׁבֵי נְטָעִים, הַשָּׂרִיגִים שְׁלֽשֶׁת הָרוֹעִים:

קהל תִּתְחַסַּד תִּתָּבַר עִמָּם, וְעִם עִקְּשִׁים תִּתַּפַּל לְהֻמָּם:

חזן תָּמִים דַּרְכְּךָ תַּקִּיף מִכֹּל, תּוּכַל לְבַדְּךָ לַעֲשׂוֹת אֶת־כֹּל:

קהל תּוֹחַלְתִּי וְשִׂבְרִי וְתִקְוָתִי, תַּאֲוַת נַפְשִׁי וּתְשׁוּקָתִי:

חזן תְּהִלָּתִי וְתִפְאַרְתִּי וְעֻזִּי, מִמְּעֵי אִמִּי גּוֹחִי וְגוֹזִי:

קהל תְּמִים דֵּעִים אֵל דֵּעוֹת אֶחָד, כָּל־הַלְּבָבוֹת דּוֹרֵשׁ יָֽחַד:

ליום חמישי

חזן מִי כָמֽוֹךָ דֵּעָה מוֹרֶה, נִיב שְׂפָתַֽיִם אַתָּה בוֹרֵא:

קהל מַחְשְׁבוֹתֶֽיךָ עָמְקוּ וְרָֽמוּ, וּשְׁנוֹתֶֽיךָ לֹא יִתָּֽמּוּ:

חזן לֹא לִמְּדֽוּךָ חָכְמָתֶֽךָ, וְלֹא הֱבִינֽוּךָ תְּבוּנָתֶֽךָ:

קהל לֹא קִבַּֽלְתָּ מַלְכוּתֶֽךָ, וְלֹא יָרַֽשְׁתָּ מֶמְשַׁלְתֶּֽךָ:

חזן לְעוֹלָם יְהֵא לְךָ לְבַדֶּֽךָ, וְלֹא לַאֲחֵרִים כְּבוֹד הוֹדֶֽךָ:

קהל וְלֹא תִתֵּן לֵאלֹהִים אֲחֵרִים, תְּהִלָּתְךָ לִפְסִילִים וְזָרִים:

חזן וְכָבוֹד וְגַם כָּל־יְקָר מֵאִתָּךְ, וּכְבוֹדְךָ לֹא לְזָרִים אִתָּךְ:

קהל אַתָּה תָעִיד בְּיִחוּדֶֽךָ, וְתוֹרָתְךָ וַעֲבָדֶֽיךָ:

חזן אֱלֹהֵֽינוּ עַל יִחוּדֶֽךָ, אַתָּה עֵד אֱמֶת וַאֲנַֽחְנוּ עֲבָדֶֽיךָ:

קהל לְפָנֶֽיךָ אֵל לֹא הִקְדִּימָךְ, וּבִמְלַאכְתְּךָ אֵין־זָר עִמָּךְ:

חזן לֹא נוֹעַֽצְתָּ וְלֹא לֻמַּֽדְתָּ, בְּחַדֶּשְׁךָ בְרִיאוֹת כִּי נְבוּנֽוֹתָ:

קהל מִמַּעֲמַקֵּי מַחְשְׁבוֹתֶֽיךָ, וּמִלִּבְּךָ כָּל־פְּעֻלּוֹתֶֽיךָ:

חזן קְצוֹת דְּרָכֶֽיךָ הֲלֹא הִכַּֽרְנוּ, וּמִמַּעֲשֶֽׂיךָ הֵן יָדָֽעְנוּ:

קהל שָׁאַתָּה אֵל כֹּל יָצַֽרְתָּ, לְבַדֶּֽךָ מְאֽוּמָה לֹא נִגְרָֽעְתָּ:

חזן לַעֲשׂוֹת מְלַאכְתְּךָ לֹא לֻחָֽצְתָּ, וְגַם לְעֵֽזֶר לֹא נִצְרָֽכְתָּ:

קהל כִּי אַתָּה הָיִֽיתָ לִפְנֵי הַכֹּל, וְאָז בְּאֵין־כֹּל לֹא נִצְרַֽכְתָּ כֹּל:

חזן כִּי מֵאַהֲבָתְךָ עֲבָדֶֽיךָ, כֹּל בָּרָֽאתָ לִכְבוֹדֶֽךָ:

קהל לֹא נִשְׁמַע מִן־אָז וָהָֽלְאָה, וְלֹא קָם וְלֹא נִהְיָה וְלֹא נִרְאָה:

חזן וְלֹא נוֹדַע אֵל זוּלָתֶֽךָ, וְאֵין כָּמֽוֹךָ וְאֵין בִּלְתֶּֽךָ:

קהל וְגַם אַחֲרֶֽיךָ לֹא יִהְיֶה אֵל, רִאשׁוֹן וְאַחֲרוֹן אֵל יִשְׂרָאֵל:

חזן בָּרוּךְ אַתָּה יָחִיד וּמְיֻחָד, יְהֹוָה אֶחָד וּשְׁמוֹ אֶחָד:

קהל אֲשֶׁר מִי יַעֲשֶׂה כִמְלַאכְתֶּֽךָ, כְּמַעֲשֶֽׂיךָ וְכִגְבוּרוֹתֶֽיךָ:

חזן אֵין יְצִיר זוּלַת יְצִירָתֶֽךָ, וְאֵין בְּרִיאָה כִּי אִם־בְּרִיאָתֶֽךָ:

קהל כָּל־אֲשֶׁר תַּחְפֹּץ תַּעֲשֶׂה בַכֹּל, כִּי אַתָּה נַעֲלֵֽיתָ עַל־כֹּל:

חזן אֵין כָּמֽוֹךָ וְאֵין בִּלְתֶּֽךָ, כִּי אֵין אֱלֹהִים זוּלָתֶֽךָ:

קהל אַתָּה הָאֵל עֽוֹשֵׂה פֶֽלֶא, וְדָבָר מִמְּךָ לֹא יִפָּלֵא:

חזן מִי כָמֽוֹךָ נוֹרָא תְהִלּוֹת, אֱלֹהִים לְבַדְּךָ עוֹשֶׂה גְדוֹלוֹת:

קהל אֵין אוֹתוֹת כְּמוֹ אוֹתוֹתֶֽיךָ, אַף אֵין מוֹפֵת כְּמוֹ מוֹפְתֶֽיךָ:

חזן אֵין תְּבוּנָה כִּתְבוּנָתֶֽךָ, אֵין גְּדֻלָּה כִּגְדֻלָּתֶֽךָ:

קהל כִּי מְאֹד עָמְקוּ מַחְשְׁבוֹתֶֽיךָ, וְגָבְהוּ דַּרְכֵי אֹרְחוֹתֶֽיךָ:

חזן אֵין גַּאֲוָה כְּמוֹ גַאֲוָתֶֽךָ, אַף אֵין עֲנָוָה כְּעַנְוָתֶֽךָ:

קהל אֵין קְדֻשָּׁה כִּקְדֻשָּׁתֶֽךָ, אֵין קְרֵבוּת כְּמוֹ קְרֵבוּתֶֽךָ:

חזן אֵין צְדָקָה כְּמוֹ צִדְקָתֶֽךָ, אֵין תְּשׁוּעָה כִּתְשׁוּעָתֶֽךָ:

קהל אֵין זְרֽוֹעַ כִּזְרוֹעוֹתֶֽיךָ, אֵין קוֹל כְּרַֽעַם גְּבוּרוֹתֶֽיךָ:

חזן אֵין רַחֲמִים כְּרַחֲמָנוּתֶֽךָ, אֵין חֲנִינוּת כַּחֲנִינוּתֶֽךָ:

קהל אֵין אֱלָהוּת כֵּאלָהוּתֶֽךָ, וְאֵין מַפְלִיא כְּשֵׁם תִּפְאַרְתֶּֽךָ:

חזן כִּי שְׁמוֹתֶֽיךָ אֵלִים מְרוּצִים, בְּזָכְרְךָ לְחוּצִים לְהַפְלִיא נְחוּצִים:

קהל וְאַשָּׁף וְחַרְטֹם לֹא יִלְחָצֽוּךָ, וְכָל־שֵׁם וָלַֽהַט לֹא יְנַצְּחֽוּךָ:

חזן לֹא יְנַצְּחֽוּךָ כָּל־הַחֲכָמִים, כָּל־הַקּוֹסְמִים וְהַחַרְטֻמִּים:

קהל אַתָּה מֵשִׁיב לְאָחוֹר חֲכָמִים, לֹא יוּכְלוּ לְךָ עֲרוּמִים וְקוֹסְמִים:

חזן לְהָשִׁיב לְאָחוֹר מְזִמּוֹתֶֽיךָ, לְהָפֵר עֲצַת סוֹד גְּזֵרָתֶֽךָ:

קהל מֵרְצוֹנְךָ לֹא יַעֲבִירֽוּךָ, לֹא יְמַהֲרֽוּךָ וְלֹא יְאַחֲרֽוּךָ:

חזן עֲצָתְךָ תָפֵר עֲצַת כָּל־יוֹעֲצִים, וְעֻזְּךָ מַחֲלִישׁ לֵב אַמִּיצִים:

קהל אַתָּה מְצַוֶּה וּפַחְדְּךָ מְשַׁוֶּה, וְאֵין עָלֶֽיךָ פָּקִיד מְצַוֶּה:

חזן אַתָּה מִקְוֶה וְאֵינְךָ מְקַוֶּה, לְךָ כָל־מְקַוֶּה נֶֽפֶשׁ תְּרַוֶּה:

קהל וְכָל־הַיְצוּרִים וְכָל־עִנְיָנָם, וְכָל־יְקָר אֲשֶׁר בְּךָ אֵין דִּמְיוֹנָם:

חזן לֹא מַחְשְׁבוֹתָם מַחְשְׁבוֹתֶֽיךָ, כִּי אֵין בּוֹרֵא זוּלָתֶֽךָ:

קהל וְאֵין דִּמְיוֹן נִפְלָא אֱלֹהֵֽינוּ, וְאֵין חֵֽקֶר נִשְׂגָּב אֲדוֹנֵֽינוּ:

חזן סָתוּר מִכָּל־סָתוּר וְעָמוּס, מִכָּל־עָמוּס וּמִכָּל־כָּמוּס:

קהל דַּק מִכָּל־דַּק וְצָפוּן מִכָּל־, צָפוּן וְיָכוֹל מִכָּל־יָכוֹל:

חזן נִשְׂגָּב מִכָּל־נִשְׂגָּב וְנֶעְלָם, מִכָּל־נֶעְלָם וּשְׁמוֹ לְעוֹלָם:

קהל גָּבֽוֹהַּ מִכָּל־גָּבֽוֹהַּ וְעֶלְיוֹן, מִכָּל־עֶלְיוֹן וּמִכָּל־חֶבְיוֹן:

חזן חָבוּי וְעָמוּק מִכָּל־עָמוּק, לֵב כָּל־דַּֽעַת עָלָיו חָמוּק:

קהל שֶׁאֵין שֵֽׂכֶל וּמַדָּע וְחָכְמָה, יְכוֹלִים לְהַשְׁווֹת לוֹ כָּל־מְאֽוּמָה:

חזן לֹא מַשִּׂיגִים לוֹ אֵיךְ וְכַמֶּה, וְלֹא מוֹצְאִים לוֹ דָּבָר דּוֹמֶה:

קהל מִקְרֶה וְעַרְעָר וְשִׁנּוּי וְטָפֵל, וְחֶֽבֶר וּמִסְמָךְ אוֹר וְגַם־אֹֽפֶל:

חזן וְלֹא מוֹצְאִים לוֹ מַרְאֶה וָצֶֽבַע, וְלֹא כָל־טֶֽבַע אֲשֶׁר שֵׁשׁ וָשֶֽׁבַע:

קהל לָכֵן נְבוּכוֹת כָּל־עֶשְׁתּוֹנוֹת, וְנִבְהָלוֹת כָּל הַחִשְּׁבוֹנוֹת:

חזן וְכָל־שַׂרְעַפִּים וְכָל־הַרְהוֹרִים, נִלְאִים לָשׂוּם בּוֹ שִׁעוּרִים:

קהל מִלְּשַׁעֲרֵֽהוּ וּמִלְּהַגְבִּילֵֽהוּ, מִלְּתָאֲרֵֽהוּ וּמִלְפַרְסְמֵֽהוּ:

חזן בְּכָל־שִׂכְלֵֽנוּ חִפַּשְׂנֽוּהוּ, בְּמַדָּעֵֽנוּ לִמְצֹא מַה־הוּא:

קהל לֹא מְצָאנֽוּהוּ וְלֹא יְדַעְנֽוּהוּ, אַךְ מִמַּעֲשָׂיו הִכַּרְנֽוּהוּ:

חזן שֶׁהוּא לְבַדּוֹ יוֹצֵר אֶחָד, חַי וְכֹל יוּכַל וְחָכָם מְיֻחָד:

קהל כִּי הוּא הָיָה לַכֹּל קֹֽדֶם, עַל־כֵּן נִקְרָא אֱלֹֽהֵי קֶֽדֶם:

חזן בַּעֲשׂוֹתוֹ בְּלִי כָל־מאוּם אֶת־כֹּל, יָדַֽעְנוּ כִּי הוּא כֹּל יָכוֹל:

קהל בַּאֲשֶׁר מַעֲשָׂיו בְּחָכְמָה כֻּלָּם, יָדַֽעְנוּ כִּי בְּבִינָה פְעָלָם:

חזן בְּכָל־יוֹם וָיוֹם בְּחַדְּשׁוֹ כֻלָּם, יָדַֽעְנוּ כִּי הוּא אֱלֹהֵי עוֹלָם:

קהל בַּאֲשֶׁר הָיָה קֹֽדֶם לְכֻלָּם, יָדַֽעְנוּ כִּי הוּא חַי לְעוֹלָם:

חזן וְאֵין לְהַרְהֵר אַחַר יוֹצְרֵֽנוּ, בְּלִבֵּֽנוּ וְלֹא בְּסִפּוּרֵֽנוּ:

קהל לְמֶֽמֶשׁ וָגֹֽדֶשׁ לֹא נְשַׁעֲרֵֽהוּ, לְטָפֵל וָתֹֽאַר לֹא נְדַמֵּֽהוּ:

חזן וְלֹא נְחַשְּׁבֵֽהוּ לְעִקָּר וְנִצָּב, וְלֹא לְמִין וְכָל־אוֹן וּלְכָל־נִקְצָב:

קהל כָּל־הַנִּרְאִים וְהַנִּשְׂכָּלִים, וְהַמַּדָּעִים בְּעֶֽשֶׂר כְּלוּלִים:

חזן וְשֶֽׁבַע כַּמָּיוֹת וְשֵֽׁשֶׁת נִדּוֹת, וְשָׁלשׁ גְּזֵרוֹת וְעִתּוֹת וּמִדּוֹת:

קהל הֵן בַּבּוֹרֵא אֵין גַּם אֶחָד, כִּי הוּא בְרָאָם כֻּלָּם יָֽחַד:

חזן כֻּלָּם יִבְלוּ אַף יַחֲלֹֽפוּ, הֵם יֹאבֵֽדוּ וְאַף יָסֽוּפוּ:

קהל וְאַתָּה תַעֲמֹד וּתְבַלֶּה כֻלָּם, כִּי חַי וְקַיָּם אַתָּה לְעוֹלָם:

ליום ששי

חזן אַתָּה לְבַדְּךָ יוֹצֵר כֹּל הוּא, וְלֹא יִדְמֶה מַעֲשֶׂה לְעוֹשֵֽׂהוּ:

קהל כָּל־הָאֲרָצוֹת לֹא יְכִילֽוּךָ, וְאַף שָׁמַֽיִם לֹא יְכַלְכְּלֽוּךָ:

חזן אָז יָחִֽילוּ מַֽיִם חַיִּים, מִפָּנֶֽיךָ אֱלֹהִים חַיִּים:

קהל רָֽעֲשָׁה אֶֽרֶץ וְנָֽסוּ מָֽיִם, וְנָֽטְפוּ מַֽיִם אַף־שָׁמָֽיִם:

חזן נוֹטֶה לְבַדְּךָ הַשָּׁמָֽיִם, רוֹקַע הָאָֽרֶץ עַל הַמָּֽיִם:

קהל עָשִֽׂיתָ כָל־חֶפְצְךָ לְבַדֶּֽךָ, וְלֹא נִצְרַֽכְתָּ עֵֽזֶר כְּנֶגְדֶּֽךָ:

חזן סוֹעֵד אֵין מִי יִסְעָדֶֽךָ, הַכֹּל מִמְּךָ וּמִיָּדֶֽךָ:

קהל כְּכֹחֲךָ אָז כֵּן עַתָּה וְדַעְתָּךְ, וּלְעוֹלָם כָּל־כְּבוֹדְךָ אִתָּךְ:

חזן וְלֹא יָעַֽפְתָּ וְלֹא יָגָֽעְתָּ, כִּי בִמְלַאכְתְּךָ לֹא עָמָֽלְתָּ:

קהל כִּי בִדְבָרְךָ כָּל־יְצוּרֶֽיךָ, וּמַעֲשֵׂה חֶפְצְךָ בְּמַאֲמָרֶֽיךָ:

חזן וְלֹא אִחַרְתּוֹ וְלֹא מִהַרְתּוֹ, הַכֹּל עֲשִׂיתוֹ יָפֶה בְעִתּוֹ:

קהל מִבְּלִי מְאֽוּמָה כֹּל חִדַּֽשְׁתָּ, וְאֶת־הַכֹּל בְּלִי כְלִי פָּעָֽלְתָּ:

חזן וְעַל לֹא יְסוֹד הַכֹּל יָסָֽדְתָּ, בִּרְצוֹן רוּחֲךָ כֹּל תָּלִֽיתָ:

קהל זְרוֹעוֹת עוֹלָם אֶת־כֹּל נוֹשְׂאוֹת, מֵרֹאשׁ וְעַד־סוֹף וְאֵינָן נִלְאוֹת:

חזן בְּעֵינֶֽיךָ לֹא דָבָר הֻקְשָׁה, רְצוֹנְךָ כָּל־דָּבָר רוּחֲךָ עוֹשָׂה:

קהל לִפְעֻלָּתְךָ לֹא דָמִֽיתָ, אֶל־כָּל־תֹּֽאַר לֹא שָׁוִֽיתָ:

חזן וְלֹא קָדְמָה לִמְלַאכְתְּךָ מְלָאכָה, חָכְמָתְךָ הִיא הַכֹּל עָרְכָה:

קהל לִרְצוֹנְךָ לֹא קִדְּמוּ וְאֵחֵֽרוּ, וְעַל חֶפְצְךָ לֹא נוֹסְפוּ וְחָסֵֽרוּ:

חזן מִכָּל־חֶפְצְךָ לֹא שָׁכַֽחְתָּ, וְדָבָר אֶחָד לֹא חִסַּֽרְתָּ:

קהל לֹא הֶחְסַֽרְתָּ וְלֹא הֶעְדַּֽפְתָּ, וְדָבָר רֵיק בָּם לֹא פָעָֽלְתָּ:

חזן אַתָּה תְשַׁבְּחֵם וּמִי הִתְעִיבָם, וְשֵֽׁמֶץ דָּבָר לֹא נִמְצָא בָם:

קהל הַחִלּֽוֹתָ בְּחָכְמָה עֲשִׂיתָם, בִּתְבוּנָה וּבְדַֽעַת כִּלִּיתָם:

חזן מֵרֵאשִׁית וְעַד אַחֲרִית עֲשׂוּיִם, בֶּאֱמֶת וּבְיֽשֶׁר וְטוֹב רְאוּיִם:

קהל הִקְדַּֽמְתָּ בְּמַעֲשֵׂי יָדֶֽיךָ, רֹב רַחֲמֶֽיךָ וַחֲסָדֶֽיךָ:

חזן כִּי רַחֲמֶֽיךָ וַחֲסָדֶֽיךָ, הֲלֹא מֵעוֹלָם עַל עֲבָדֶֽיךָ:

קהל וְעַד לֹא כָל־חַי הוּכַן לְכַלְכֵּל, לִפְנֵי אוֹכֵל תִּתֶּן־אֹֽכֶל:

חזן וּמָעוֹן וּמִקְוֶה תַּעֲשֶׂה בְּפִי כֹל, צָרְכֵי הַכֹּל כַּאֲשֶׁר לַכֹּל:

קהל שְׁלֽשֶׁת יָמִים הָרִאשׁוֹנִים, אָז הֱכִינוֹתָם לָאַחֲרוֹנִים:

חזן אָז עָטִֽיתָ אוֹר כַּשַּׂלְמָה, אֵֽדֶר מְאוֹרוֹת מִמּוּל שַׂלְמָה:

קהל בְּטֶֽרֶם כָּל־יְצוּר מְאֹד גָּדַֽלְתָּ, וְאַחַר כֹּל מְאֹד נִתְגַּדַּֽלְתָּ:

חזן אָז בְּאֵין לְבוּשׁ הוֹד וְהָדָר לוֹבֵשׁ, עַד לֹא אוֹרֵג גֵּאוּת לָבֵשׁ:

קהל אוֹר כַּשַּׂלְמָה וְכַמְּעִיל עוֹטֶה, שָׁמַֽיִם כַּיְרִיעָה נוֹטֶה:

חזן עָשִֽׂיתָ בָּם לְאוֹרִים דְּרָכִים, וְרָצוֹא וָשׁוֹב בְּנַֽחַת מְהַלְּכִים:

קהל הִבְדַּֽלְתָּ בֵּין מַֽיִם לָמָֽיִם, בִּמְתִיחַת רְקִֽיעַ הַשָּׁמָֽיִם:

חזן מְזוֹנוֹת מְעוֹנוֹת לְשֶֽׁרֶץ מָֽיִם, וְעוֹף יְעוֹפֵף עַל הַשָּׁמָֽיִם:

קהל עֵֽשֶׂב וְחָצִיר לָבְשָׁה אֲדָמָה, מַאֲכָל לְחַיָּה וּלְכָל־בְּהֵמָה:

חזן בְּקֶֽרֶן בֶּן־שֶֽׁמֶן גַּן נָטָֽעְתָּ, אֶל־הָאָדָם אֲשֶׁר עָשִֽׂיתָ:

קהל עֵֽזֶר כְּנֶגְדּוֹ עָשִֽׂיתָ לּוֹ, דֵּי מַחְסוֹרוֹ אֲשֶׁר יֶחְסַר לוֹ:

חזן כָּל־מַעֲשֶֽׂיךָ בְּיָדוֹ תַּֽתָּה, וְתַֽחַת רַגְלָיו הַכֹּל שַֽׁתָּה:

קהל לְהַעֲלוֹת מֵהֶם בָּקָר וָצֹאן, עַל מִזְבַּחֲךָ יַעֲלוּ לְרָצוֹן:

חזן עָשִֽׂיתָ לּוֹ כֻתֹּֽנֶת לְשָׁרֵת, לְהַדְרַת־קֹֽדֶשׁ וּלְתִפְאָֽרֶת:

קהל שַֽׂמְתָּ בְקִרְבּוֹ חָכְמַת אֱלֹהִים, כִּי יְצַרְתּוֹ לְךָ בְּצֶֽלֶם אֱלֹהִים:

חזן לֹא מָנַֽעְתָּ עַל־פְּנֵי הָאֲדָמָה, צָרְכֵי אָדָם וְכֻלָּם בְּחָכְמָה:

קהל מַעֲשֶֽׂיךָ מְאֹד רַבּוּ וְגָדְלוּ, וְשִׁמְךָ יְהֹוָה כֻּלָּם יְהַלְלוּ:

חזן רַבּוּ וְגָדְלוּ מְאֹד מַעֲשֶֽׂיךָ, יוֹדֽוּךָ יְהֹוָה כָּל־מַעֲשֶֽׂיךָ:

קהל כֹּל פָּעַֽלְתָּ לַמַּעֲנֶֽךָ, וְלִכְבוֹדְךָ כָּל קִנְיָנֶֽךָ:

ליום השבת

חזן אָז בַּיּוֹם הַשְּׁבִיעִי נַֽחְתָּ, יוֹם הַשַּׁבָּת עַל־כֵּן בֵּרַֽכְתָּ:

קהל וְעַל כָּל־פֹּֽעַל תְּהִלָּה עֲרוּכָה, חֲסִידֶֽיךָ בְּכָל־עֵת יְבָרְכֽוּכָה:

חזן בָּרוּךְ יְהֹוָה יוֹצֵר כֻּלָּם, אֱלֹהִים חַיִּים וּמֶֽלֶךְ עוֹלָם:

קהל כִּי מֵעוֹלָם עַל עֲבָדֶֽיךָ, רֹב רַחֲמֶֽיךָ וַחֲסָדֶֽיךָ:

חזן וּבְמִצְרַֽיִם הַחִלּֽוֹתָ, לְהוֹדִֽיעַ כִּי מְאֹד נַעֲלֵֽיתָ:

קהל עַל כָּל־אֱלֹהִים בַּעֲשׂוֹתְךָ בָהֶם, שְׁפָטִים גְּדוֹלִים וּבֵאלֹהֵיהֶם:

חזן בְּבָקְעֲךָ יַם־סוּף עַמְּךָ רָאוּ, הַיָּד הַגְּדוֹלָה וַיִּירָֽאוּ:

קהל נִהַֽגְתָּ עַמְּךָ לַעֲשׂוֹת לָךְ, שֵׁם תִּפְאֶֽרֶת לְהַרְאוֹת גָּדְלָךְ:

חזן וְדִבַּֽרְתָּ עִמָּם מִן־הַשָּׁמָֽיִם, וְגַם הֶעָבִים נָֽטְפוּ מָֽיִם:

קהל יָדַֽעְתָּ לֶכְתָּם בַּמִּדְבָּר, בְּאֶֽרֶץ צִיָּה אִישׁ לֹא עָבָר:

חזן תַּֽתָּה לְעַמְּךָ דְּגַן שָׁמָֽיִם, וְכֶעָפָר שְׁאֵר וּמִצּוּר מָֽיִם:

קהל תְּגָרֵשׁ גּוֹיִם רַבִּים עַמִּים, יִירְשׁוּ אַרְצָם וַעֲמַל לְאֻמִּים:

חזן בַּעֲבוּר יִשְׁמְרוּ חֻקִּים וְתוֹרוֹת, אִמְרוֹת יְהֹוָה אֲמָרוֹת טְהוֹרוֹת:

קהל וַיִּתְעַדְּנוּ בְּמִרְעֶה שָׁמֵן, וּמֵחַלְמִישׁ צוּר פַּלְגֵי־שָֽׁמֶן:

חזן בְּנוּחָם בָּנוּ עִיר קָדְשֶֽׁךָ, וַיְפָאֲרוּ בֵּית מִקְדָּשֶֽׁךָ:

קהל וַתֹּֽאמֶר פֹּה אֵשֵׁב לְאֹֽרֶךְ, יָמִים צֵידָהּ בָּרֵךְ אֲבָרֵךְ:

חזן כִּי שָׁם יִזְבְּחוּ זִבְחֵי־צֶֽדֶק, אַף כֹּהֲנֶֽיךָ יִלְבְּשׁוּ־צֶֽדֶק:

קהל וּבֵית הַלֵּוִי נְעִימוֹת יְזַמֵּֽרוּ, לְךָ יִתְרוֹעֲעוּ אַף יָשִֽׁירוּ:

חזן בֵּית יִשְׂרָאֵל וְיִרְאֵי יְהֹוָה, יְכַבְּדוּ וְיוֹדוּ שִׁמְךָ יְהֹוָה:

קהל הֱטִיבֽוֹתָ מְאֹד לָרִאשׁוֹנִים, כֵּן תֵּיטִיב גַּם לָאַחֲרוֹנִים:

חזן יְהֹוָה תָּשִׂישׂ נָא עָלֵֽינוּ, כַּאֲשֶׁר שַֽׂשְׂתָּ עַל אֲבוֹתֵֽינוּ:

קהל אוֹתָֽנוּ לְהַרְבּוֹת וּלְהֵיטִיב, וְנוֹדֶה לְּךָ לְעוֹלָם כִּי תֵיטִיב:

חזן יְהֹוָה תִּבְנֶה עִירְךָ מְהֵרָה, כִּי עָלֶֽיהָ שִׁמְךָ נִקְרָא:

קהל וְקֶֽרֶן דָּוִד תַּצְמִֽיחַ בָּהּ, וְתִשְׁכֹּן לְעוֹלָם יְהֹוָה בְּקִרְבָּהּ:

חזן זִבְחֵי־צֶֽדֶק שָֽׁמָּה נִזְבְּחָה, וְכִֽימֵי קֶֽדֶם תֶּעֱרַב מִנְחָה:

קהל וּבָרֵךְ עַמְּךָ בְּאוֹר פָּנֶֽיךָ, כִּי חֲפֵצִים לַעֲשׂוֹת רְצוֹנֶֽךָ:

חזן וּבִרְצוֹנְךָ תַּעֲשֶׂה חֶפְצֵֽנוּ, הַבֶּט־נָא עַמְּךָ כֻלָּֽנוּ:

קהל בְּחַרְתָּֽנוּ לִהְיוֹת לְךָ לְעַם סְגֻלָּה, וְעַל־עַמְּךָ בִרְכָתֶֽךָ סֶּֽלָה:

חזן וְתָמִיד נְסַפֵּר תְּהִלָּתֶֽךָ, וּנְהַלֵּל לְשֵׁם תִּפְאַרְתֶּֽךָ:

קהל וּמִבִּרְכָתְךָ עַמְּךָ יְבֹרָךְ, כִּי אֶת־כָּל־אֲשֶׁר תְּבָרֵךְ מְבֹרָךְ:

חזן וַאֲנִי בְּעוֹדִי אֲהַלְלָה בוֹרְאִי, וַאֲבָרֶכְכָה כָּל־יְמֵי צְבָאִי:

קהל יְהִי שֵׁם יְהֹוָה מְבֹרָךְ לְעוֹלָם, מִן־הָעוֹלָם וְעַד־הָעוֹלָם:

כַּכָּתוּב בָּרוּךְ יְהֹוָה אֱלֹהֵי יִשְׂרָאֵל מִן־הָעוֹלָם וְעַד־הָעֹלָם וַיֹּאמְרוּ כָל־הָעָם אָמֵן וְהַלֵּל לַיהֹוָה: עָנֵה דָנִיֵּאל וְאָמַר לֶהֱוֵא שְׁמֵהּ דִּי־אֱלָהָא מְבָרַךְ מִן־עָלְמָא וְעַד־עָלְמָא דִּי חָכְמְתָא וּגְבוּרְתָא דִּי־לֵהּ הִיא: וְנֶאֱמַר וַיֹּאמְרוּ הַלְוִיִּם יֵשֽׁוּעַ וְקַדְמִיאֵל בָּנִי חֲשַׁבְנְיָה שֵׁרֵבְיָה הוֹדִיָּה שְׁבַנְיָה פְתַחְיָה קֽוּמוּ בָּרְכוּ אֶת־יְהֹוָה אֱלֹהֵיכֶם מִן־הָעוֹלָם עַד־הָעוֹלָם וִיבָרְכוּ שֵׁם כְּבֹדֶֽךָ וּמְרוֹמַם עַל־כָּל־בְּרָכָה וּתְהִלָּה: וְנֶאֱמַר בָּרוּךְ יְהֹוָה אֱלֹהֵי יִשְׂרָאֵל מִן־הָעוֹלָם וְעַד הָעוֹלָם וְאָמַר כָּל־הָעָם אָמֵן הַלְלוּיָהּ: וְנֶאֱמַר וַיְבָֽרֶךְ דָּוִיד אֶת־יְהֹוָה לְעֵינֵי כָּל־הַקָּהָל וַיֹּֽאמֶר דָּוִיד בָּרוּךְ אַתָּה יְהֹוָה אֱלֹהֵי יִשְׂרָאֵל אָבִֽינוּ מֵעוֹלָם וְעַד־עוֹלָם:

אנעים זמירות

חזן אַנְעִים זְמִירוֹת וְשִׁירִים אֶאֱרוֹג, כִּי אֵלֶֽיךָ נַפְשִׁי תַעֲרוֹג.

קהל נַפְשִׁי חָמְדָה בְּצֵל יָדֶֽךָ, לָדַֽעַת כָּל רָז סוֹדֶֽךָ.

חזן מִדֵּי דַבְּרִי בִּכְבוֹדֶֽךָ, הוֹמֶה לִבִּי אֶל דּוֹדֶֽיךָ.

קהל עַל כֵּן אֲדַבֵּר בְּךָ נִכְבָּדוֹת, וְשִׁמְךָ אֲכַבֵּד בְּשִׁירֵי יְדִידוֹת.

חזן אֲסַפְּרָה כְבוֹדְךָ וְלֹא רְאִיתִֽיךָ, אֲדַמְּךָ אֲכַנְּךָ וְלֹא יְדַעְתִּֽיךָ.

קהל בְּיַד נְבִיאֶֽיךָ בְּסוֹד עֲבָדֶֽיךָ, דִּמִּֽיתָ הֲדַר כְבוֹד הוֹדֶֽךָ.

חזן גְּדֻלָּתְךָ וּגְבוּרָתֶֽךָ. כִּנּוּ לְתֹֽקֶף פְּעֻלָּתֶֽךָ.

קהל דִּמּוּ אוֹתְךָ וְלֹא כְפִי יֶשְׁךָ, וַיְשַׁוּֽוּךָ לְפִי מַעֲשֶֽׂיךָ.

חזן הִמְשִׁילֽוּךָ בְּרוֹב חֶזְיוֹנוֹת, הִנְּךָ אֶחָד בְּכָל דִּמְיוֹנוֹת.

קהל וַיֶּחֱזוּ בְךָ זִקְנָה וּבַחֲרוּת, וּשְׂעַר רֹאשְׁךָ בְּשֵׂיבָה וְשַׁחֲרוּת.

חזן זִקְנָה בְּיוֹם דִּין וּבַחֲרוּת בְּיוֹם קְרָב, כְּאִישׁ מִלְחָמוֹת יָדָיו לוֹ רָב.

קהל חָבַשׁ כּֽוֹבַע יְשׁוּעָה בְּרֹאשוֹ, הוֹשִֽׁיעָה לּוֹ יְמִינוֹ וּזְרֽוֹעַ קָדְשׁוֹ.

חזן טַלְלֵי אוֹרוֹת רֹאשוֹ נִמְלָא, קְוֻצּוֹתָיו רְסִֽיסֵי לָֽיְלָה.

קהל יִתְפָּאֵר בִּי כִּי חָפֵץ בִּי, וְהוּא יִהְיֶה לִי לַעֲטֶֽרֶת צְבִי.

חזן כֶּֽתֶם טָהוֹר פָּז דְּמוּת רֹאשוֹ, וְחַק עַל מֵֽצַח כְּבוֹד שֵׁם קָדְשׁוֹ.

קהל לְחֵן וּלְכָבוֹד צְבִי תִפְאָרָה, אֻמָּתוֹ לוֹ עִטְּרָה עֲטָרָה.

חזן מַחְלְפוֹת רֹאשוֹ כְּבִימֵי בְחֻרוֹת, קְוֻצּוֹתָיו תַּלְתַּלִּים שְׁחוֹרוֹת.

קהל נְוֵה הַצֶּֽדֶק צְבִי תִפְאַרְתּוֹ, יַעֲלֶה נָּא עַל רֹאש שִׂמְחָתוֹ.

חזן סְגֻלָּתוֹ תְּהִי נָא בְיָדוֹ עֲטֶֽרֶת. וּצְנִיף מְלוּכָה צְבִי תִפְאֶֽרֶת.

קהל עֲמוּסִים נְשָׂאָם עֲטֶֽרֶת עִנְּדָם, מֵאֲשֶׁר יָקְרוּ בְעֵינָיו כִּבְּדָם.

חזן פְּאֵרוֹ עָלַי וּפְאֵרִי עָלָיו, וְקָרוֹב אֵלַי בְּקָרְאִי אֵלָיו.

קהל צַח וְאָדוֹם לִלְבוּשׁוֹ אָדוֹם, פּוּרָה בְּדָרְכוֹ בְּבוֹאוֹ מֵאֱדוֹם.

חזן קֶֽשֶׁר תְּפִלִּין הֶרְאָה לֶעָנָו, תְּמוּנַת יְיָ לְנֶֽגֶד עֵינָיו.

קהל רוֹצֶה בְעַמּוֹ עֲנָוִים יְפָאֵר, יוֹשֵׁב תְּהִלּוֹת בָּם לְהִתְפָּאֵר.

חזן רֹאשׁ דְּבָרְךָ אֱמֶת קוֹרֵא מֵרֹאשׁ, דּוֹר וָדוֹר עַם דּוֹרֶשְׁךָ דְּרוֹשׁ.

קהל שִׁית הֲמוֹן שִׁירַי נָא עָלֶֽיךָ, וְרִנָּתִי תִּקְרַב אֵלֶֽיךָ.

חזן תְּהִלָּתִי תְּהִי לְרֹאשׁךָ עֲטֶֽרֶת, וּתְפִלָּתִי תִּכּוֹן קְטֹֽרֶת.

קהל תִּיקַר שִׁירַת רָשׁ בְּעֵינֶֽיךָ, כַּשִּׁיר יוּשַׁר עַל קָרְבָּנֶֽיךָ.

חזן בִּרְכָתִי תַעֲלֶה לְרֹאשׁ מַשְבִּיר, מְחוֹלֵל וּמוֹלִיד צַדִּיק כַּבִּיר.

קהל וּבְבִרְכָתִי תְנַעֲנַע לִי רֹאשׁ, וְאוֹתָהּ קַח לְךָ כִּבְשָׂמִים רֹאשׁ.

חזן יֶעֱרַב נָא שִׂיחִי עָלֶֽיךָ. כִּי נַפְשִׁי תַעֲרוֹג אֵלֶֽיךָ.

לְךָ יְיָ הַגְּדֻלָּה וְהַגְּבוּרָה וְהַתִּפְאֶֽרֶת וְהַנֵּֽצַח וְהַהוֹד, כִּי כֹל בַּשָּׁמַֽיִם וּבָאָֽרֶץ, לְךָ יְיָ הַמַּמְלָכָה, וְהַמִּתְנַשֵּׂא לְכֹל לְרֹאשׁ. מִי יְמַלֵּל גְּבוּרוֹת יְיָ, יַשְׁמִֽיעַ כָּל תְּהִלָּתוֹ.