(א) הַ֥לְלוּיָ֨הּ הַֽלְל֣וּ אֶת־יְ֭הוָה מִן־הַשָּׁמַ֑יִם הַֽ֝לְל֗וּהוּ בַּמְּרוֹמִֽים׃

(ב) הַֽלְל֥וּהוּ כָל־מַלְאָכָ֑יו

הַֽ֝לְל֗וּהוּ כָּל־צְבָאָֽיו׃

(ג) הַֽ֭לְלוּהוּ שֶׁ֣מֶשׁ וְיָרֵ֑חַ

הַ֝לְל֗וּהוּ כָּל־כּ֥וֹכְבֵי אֽוֹר׃

(ד) הַֽ֭לְלוּהוּ שְׁמֵ֣י הַשָּׁמָ֑יִם

וְ֝הַמַּ֗יִם אֲשֶׁ֤ר מֵעַ֬ל הַשָּׁמָֽיִם׃

(ה) יְֽ֭הַֽלְלוּ אֶת־שֵׁ֣ם יְהוָ֑ה

כִּ֤י ה֭וּא צִוָּ֣ה וְנִבְרָֽאוּ׃

(ו) וַיַּעֲמִידֵ֣ם לָעַ֣ד לְעוֹלָ֑ם

חָק־נָ֝תַ֗ן וְלֹ֣א יַעֲבֽוֹר׃

(יג) יְהַלְל֤וּ ׀ אֶת־שֵׁ֬ם יְהוָ֗ה כִּֽי־נִשְׂגָּ֣ב שְׁמ֣וֹ לְבַדּ֑וֹ ה֝וֹד֗וֹ עַל־אֶ֥רֶץ וְשָׁמָֽיִם׃

(יד) וַיָּ֤רֶם קֶ֨רֶן ׀ לְעַמּ֡וֹ תְּהִלָּ֤ה לְֽכָל־חֲסִידָ֗יו לִבְנֵ֣י יִ֭שְׂרָאֵל עַֽם־קְרֹב֗וֹ הַֽלְלוּיָֽהּ׃